La Conseyería de Cultura, Política Llingüística y Turismu, al traviés de la Sociedá Pública de Xestión y Promoción Turística y Cultural, acaba d’echar a andar el proyectu Asturies, Cultura en Rede, col envís d’averar a la ciudadanía, nesti tiempu d’emerxencia sanitaria, el procesu de creación de los artistes del país.
El Gobiernu promueve esti programa nel contestu de la crisis del COVID-19, consciente d’una situación que ta causando trestornos y perdes económiques importantes nel ámbitu cultural. Por esti motivu, ente les finalidaes del programa atópense dinamizar el sector y destacar el llabor que ta faciendo nesta fase de la pandemia del coronavirus, cola xente teniendo que guardase en casa y munchos cineastes, actores, músicos, artistes plásticos o escritores ellaborando conteníos culturales pa esparder al traviés de les redes sociales y los medios de comunicación.
La primer actividá d’Asturies, Cultura en Rede va ser una convocatoria pa que los autores compartan el procesu creativu pente medies de pieces audiovisuales feches nos sos talleres de trabayu. La iniciativa faise col aquel d’escoyer un máximu de 50 trabayos d’artistes asturianos o residentes n’Asturies pa que la ciudadanía pueda disfrutalos dende casa al traviés d’una web que se va crear adréi pa esti fin. Nes bases de la convocatoria, recuéyese la condición de que les grabaciones contengan información sobre’l procesu de creación y reflexones del autor alredor de les característiques y la naturaleza de les obres que fai.
Pa poder participar, los profesionales interesaos tienen que ser d’Asturies o residentes nel país y, nel so oxetu social, tien qu’incluise la creación y producción cultural. Les propuestes, según modelu normalizaú, van poder unviase a la dirección electrónica mroces@turismoycultura.asturias.es hasta’l 20 d’abril a les 14:00 hores y la escoyeta definitiva va facese’l día 22 d’abril.
La comisión de valoración va escoyer un máximu de 50 pieces audiovisuales (con un repartu de diez por disciplina artística: artes escéniques, artes plástiques, lliteratura, música y cine) según dos criterios: orixinalidá de la propuesta y calidá técnica y artística del proyectu en rellación colos medios disponibles.
Una y bona se falle la convocatoria, los proyectos que s’escueyan habrán convertise nuna pieza audiovisual onde s’enseñe’l procesu de creación d’una obra, acompañáu de dalguna muestra práctica. Les grabaciones habrán facese en casa y unviáse, como mui tarde, el llunes 27 d’abril.
Los trabayos que s’escueyan van tener una contraprestación económica de 250 euros (+IVA) por caún d’ellos y, a cambiu, la Conseyería de Cultura va alquirir los derechos d’esplotación de les pieces, que van poder enseñase en páxines web, publicaciones, sitios públicos, edificios o cualquier otru mediu o soporte físicu o dixital.