Ye l’edificiu más altu y más grande de la ciudá. Lo qu’en cualquier otra sería un rascacielos d’oficines o cases en Copenhague ye una planta incineradora de basura y residuos. Pero menuda planta. Los arquitectos que la diseñaron teníen claro que nun podía ser una nave namás, tenía que dar más serviciu a la xente. La solución, buenísima, que-y dieron foi facer una pista d’esquí y snowboard artificial, un espaciu verde, una fachada entera pa escalar (cola muria artificial más alta del mundu, de 85 metros) y un centru d’educación ambiental. Esa fachada ye perelegante y ta fecha de chaples d’aluminiu d’un metru por tres engarzaes en dameru de tal manera que dexen pasar la lluz pa dientro les instalaciones.
Pa la firma d’arquitectos que parió Copenhill, que se llama BIG, les fábriques cásique toes tienen un problema de (mala) imaxe. Ellos piensen que tienen qu’empezar a ser guapes y, amás, útiles pa la sociedá (más p’allá de polo que producen). Por eso-y dieron a tola estrucutura’l desarrollu d’una rampla que va dando vuelta pa que la xente puea esquiar per ella. Y nun ye un usu poco atractivu pa un país onde la cota d’altitú máxima ye de 170 metros perriba’l nivel del mar. Pa llegar al alto la fábrica pue xubise caminando o nun ascensor con vistes panorámiques d’au se ve’l puertu y tamién l’interior de la térmica. La pista tien niveles de dificultá diferentes, un telesiya y faroles –pa disfrutala de nueche– que se mantinen cola electricidá que sal de la planta.
Copenhill quier ser, amás, la planta de conversión de residuos n’enerxía más llimpia del mundu y ayudar a que la ciudá sía pal 2025 la primer ciudá neutra n’emisiones de carbonu. El teyáu verde que tien ocupa nueve díes de gües y chupa’l calor que da la planta, elimina partícules del aire y quita l’impactu del agua cuando llueve. Ye un exemplu, de verdá, d’arquitectura sostenible.
N’Asturies nun somos a figuranos lo que diba ser dir a pasar el domingu cola familia y amistaes a una térmica o a un basureru, pero sabemos bien lo que ye tener la tasa más alta d’enfermedaes respiratories o de cáncer d’España. Pero claro, los países nórdicos son otru mundu y saben invertir con cabeza en coses que faen bien pa la xente, con una inversión rentable dende’l puntu de mira económicu, del ambiente y de la sociedá.
Leave a Reply