White noise concert, una banda grande y nunca vista con dellos de los meyores del folk y del jazz d’Asturies

White noise concert ye un conciertu que va axuntar en JazzXixón 2017 a quince de los músicos meyores del mundu del folk y del jazz d’Asturies y ta escritu, n’esclusiva y espresamente, por Miguel Blanco. Esti compositor catalán trabaya pa big bands como la d’Arturo O’Farrill de Nueva York, cola que ganó un premiu Grammy al discu meyor de jazz llatinu. Con él –na guitarra eléctrica y a los coros– van tar, nel Teatru Xovellanos el domingu 12 de payares: Mapi Quintana como cantante, Marga Lorences col acurdión, Ruben Bada cola guitarra acústica y tamién a los coros, Ricardo Formoso cola trompeta, Toño Gómez col trombón, Eladio Díaz col saxu tenor y sopranu, Tony Cruz col baxu eléctricu, Jacobo de Miguel al pianu acústicu, Samuel Rodríguez colos teclaos y Pier Bruera cola batería.

Pela primer vez van xuntase pa un proyectu como White noise concert nomes tan importantes de dos mundos musicales –el folk y el jazz– con tan bonos profesionales n’Asturies. La banda va guiala’l mesmu Miguel Blanco, ún de los meyores arreglistes del Estáu. Blanco lleva más d’ochocientos arreglos y composiciones feches. La música d’él grabáronla o interpretáronla músicos tan representativos del jazz llatinu como Jerry González o Paquito de Rivera. Blanco tamién dirixó la big band d’él munchu tiempu, l’Afrodisian Orchestra o el septetu de jazz llatinu La calle caliente.

La coordinación del eventu ye por cuenta d’Eladio Díaz y del Colectivu Asturianu de Jazz. El conciertu, que pinta que va ser una de les esperiencies musicales del añu, empieza a les 8 la tarde y les entraes tán a 15 euros.