Nel xardín ye un proyectu específicu creau pol artista Javier Victorero pa sales d’esposiciones y pal patiu del Palaciu Velarde del Muséu de Belles Artes d’Asturies.
La muestra axunta obres feches nos últimos años onde busca una analoxía ente l’arte y el xardín y tamién ente’l pintor y el xardineru. Dos mundos nos que l’artista atopa un puntu común, la capacidá que tienen, pintor y xardineru, pa ordenar el caos. L’escoyer como inspiración el xardín –entendíu como un espaciu acotáu y ciarráu onde esperimentar les potencies del alma–, inscribe la obra de Victorero nuna tradición cósmica, metafísica y mística. Gracies al trabayu d’él, el pintor proyecta una idea de la pintura y del xardín como sitios de reflexón y pa tener esperiencies íntimes, y onde les palabres abierto/ciarrao, dientro/fuera, llimitao/illimitao y grande/pequeño –que se definen por oponese ente elles–, puen integrase al traviés de la vivencia simbólica y poética d’una realidá nueva que los inclúi xuníos, superando la lóxica de la llingüística pente medies de la esperiencia estética.
Javier Victorero ye una de les figures más importantes de la pintura asturiana de los últimos años. Amás de recibir les emponderances de críticos importantes, a Victorero escoyéronlu pa los principales certámes de pintura d’España y llevó dellos premios, como’l Premiu de la Xunta Xeneral del Principáu d’Asturies. Obra d’él forma parte de colecciones d’arte públiques y privaes bien importantes.
La muestra, que va tar instalada hasta’l próximu 23 d’avientu, axunta venti pintures, delles cerámiques, obra escultórico y soníu. Una esperiencia toa en conxunto pa metese nel mundu de les coincidencies del arte y del xardín.
Nel xardín
Javier Victorero
Muséu de Belles Artes d’Asturies
Hasta’l 23 d’avientu
Leave a Reply