El 29 d’ochobre estrenóse, na RPA, la radio pública asturiana, el programa Ente toos, un magacín cultural que dirixe y presenta Vanessa Gutiérrez. La escritora d’Urbiés empieza, d’esta manera, una etapa nueva na so carrera periodística, una trayectoria de más de 15 años en medios como Les Noticies, El Comercio, Punto Radio o TPA.
«Dicía Albert Enstein que nosotros, los mortales, llogramos la inmortalidá nes coses que creamos en común y que queden depués de nosotros; nada hai más humano y común y superviviente que l’arte, por eso esti programa se llama Ente toos, porque de toos ye y ente toos lu facemos». Con estes palabres empezaba Gutiérrez la primer edición d’esti programa, una declaración onde se condensa la esencia del espaciu: un magacín radiofónicu que da voz a les manifestaciones culturales tan estremaes que se producen n’Asturies pero col focu nes persones que les faen posibles.
Noticies, entrevistes y reportaxes van dar cuenta, nes ondes de RPA, non solo de les propuestes artístiques más nueves, sinón tamién de tolos temes que formen parte yá de la tradición y el patrimoniu asturianu. Asina, la primer sección d’esti programa tuvo dedicada a Tino Casal, el cantante y compositor fallecíu hai 25 años pero que dexó una marca imborrable na música y la cultura pop del país y del Estáu.
Un programa necesariu, esti de Vanessa Gutiérrez, tanto pol conteníu como pola persona que ta al frente d’él. Nun hai nada que faiga Vanessa Gutiérrez onde nun ponga tol empeñu pa ofrecer dalgo guapo, bono y verdadero. Por esti motivu, tolos sábados a les 16:00 hai agora una cita na RPA pa la que nun se puen poner escuses.
Leave a Reply