El Muséu de Belles Artes d’Asturies acueye, hasta’l 18 de setiembre, los bustos que l’escultor José Gragera y Herboso fixo de José Francisco de Uría y Riego y Gaspar Melchor de Xovellanos en 1862 y 1863, respectivamente. Estes dos escultures son parte de la colección artística de la Xunta Xeneral del Principáu, polo que’l so sitiu avezáu ye’l primer pisu de la sé del Parllamentu asturianu. Un proyectu de collaboración ente entrambes les dos instituciones va poner estes obres, polo menos unos meses, al alcance de los güeyos de munchos visitantes que, normalmente, nun acceden a la planta noble del palaciu de la cai Fruela.
José Gragera (Laredo, 1818 – Uviéu, 1897) formóse na capital asturiana, au se treslladaron los padres siendo él un rapacín, concretamente na Escuela de Dibuxu que dependía de la Sociedá Económica d’Amigos del País. Tres d’Uviéu, va ser Madrid la ciudá onde siga los estudios artísticos, una formación que va completar na Real Academia de Belles Artes de San Fernando y nel estudiu del escultor José Tomás. En 1854 obtuvo’l primer éxitu a nivel estatal, al ganar el concursu pa facer la estatua de Mendizábal. La fundición d’esta obra diba llevalu a París, onde residió ente 1856 y 1857.
Gragera foi un retratista escelente, hasta’l puntu de que s’aveza a citalu como autor representativu de la escultura romántica española, anque, al dicir de los estudiosos, «esti romanticismu asitia más nel espíritu que na forma», como señala María Soto Cano nel dípticu de presentación de les obres. Abonda Cano nesta idea al señalar que la so producción caracterízase «poles referencies clásiques, que s’axunten a un sentimientu conteníu», de manera tala que los personaxes retrataos amuesen siempre una «serenidá» sobria y nengún tipu d’amaneramientu.
Estes característiques resalten bien a les clares nos dos bustos que se puen ver estes selmanes nel Muséu de Belles Artes: son representaciones sobries, frontales, de xestu conteníu y modeláu firme, anque llixeramente idealizáu. Uría y Xovellanos apaecen retrataos como homes ilustres y modelos de virtú, dos señes a les que se-yos amiesten rasgos heroicos al dotalos de capa, un usu común na escultura d’esti periodu. Pal bustu de d’Uría y Riego, l’escultor inspiróse, ente otres imáxenes, nun retratu al carbón que fixera Nicolás Suárez Cantón, cuñáu del prócer asturianu; mentes que pal de Xovellanos, Gragera mandóse del retratu que fixera Ángel Monasterio en 1809.
Amás d’estos rasgos de personalidá, les dos pieces tienen en común delles característiques formales, ente les que destaca la solución cola que resuelve’l pedestal: en cuenta de la basa ática qu’avezaben a tener esti tipu d’escultures, Grajera decora la base de los bustos con esfinxes, l’escudu d’Asturies y el nome del representáu ente rames de lloréu.
Esta solución respuende bien al motivu del trabayu, pos entrambes les dos escultures fueron un encargu de la Diputación Provincial d’Uviéu, que, en 1862 –unes selmanes depués de que morriera Uría–, nomó una comisión que s’encargara de facer «dalguna demostración de gratitú a la memoria d’Uría, polos servicios importantísimos que prestó al país». Esti alcuerdu diba estendese, pocos díes más tarde, a la figura de Gaspar Melchor de Xovellanos. El trabayu de la comisión concretóse nel encargu a José Gragera de dos bustos en mármol de Carrara por un total de 21.250 riales.
El Muséu de Belles Artes d’Asturies cuenta ente les pieces de la so colección estable con otres dos obres de Gragera: un bustu d’Alfonso XII (depósitu del Muséu del Prado, de Madrid) y una copia del modelu de José Posada Herrera pal monumentu que se-y dedicó en Llanes a esti xurista y políticu del sieglu XIX.
Leave a Reply