Situáu nel puntu más al sur de la costa de Noruega, u s’engarren les torbes marines del norte y del sur, el restaurán Under ye’l primeru del mundu que s’edifica debaxo la mar y tien una situación única porque nesta zona les especies marines florecen de manera bárbara llenando’l sitiu de biodiversidá. L’establecimientu diseñólu l’estudiu d’arquitectura y diseñu Snøhetta, seguramente’l más famosu del país. Esti edificiu tamién va furrular como centru d’investigación de la vida marina.
En noruegu, under significa dos coses: pue ser debaxo o pue ser maraviya. Medio fundíu na mar, la forma monolítica de 34 metros de llargor del edificiu ruempe l’agua pa posase de frente nel fondu marín, cinco metros más p’abaxo. La estructura ta diseñada pa integrase del too, andando’l tiempu, na costa rocosa, porque la cubierta áspera va funcionar como pedreru artificial pa que lo colonicen l’ocle y les llámpares. La estructura ta fecha de formigón y pensada de manera qu’aguante la presión y los golpazos de les foles y les corrientes. El restaurán tien una superficie de cuasi 500 metros cuadraos y lo más llamativo d’él ye una galería grandísima con vista pal fondu la mar.
Pal fundador de Snøhetta, Kjetil Trædal Thorsen, Under ye una pasu alantre natural na esperimentación coles llendes del trabayu. Pa él, esta obra representa un fitu nuevu de l’arquitectura noruego y va valir pa dar formes de mirar nueves a les persones que lu visiten (so la mar, enriba’l fondu marín y ente la mar y la tierra).
Lindesnes, la costa u ta abiertu Under, ye mui conocío polo variable del tiempu y polo duro del clima, que suel cambiar de tar de tormenta a escamplar delles veces al día. Al llegar a esti sitiu, la xente va quedar impresionao viendo lo qu’hai fuera (la naturaleza brava) y lo que va topar dientro (silenciu y parés revestíes de madera de carbayu). L’interior del edificiu tien un aquel serenu gracies a unos paneles que tan colingaos del techu, fechos con texíos de los colores de la puesta del sol. El moblame ta diseñao por Snøhetta y fabricao por artesanos del país en madera siguiendo les maneres de facer tradicionales nel oficiu d’ebanista. La identidá visual y la web del Under tamién tán diseñaos pola mesma firma d’arquitectos y diseñu gráficu.
Gastronomía
El restaurán tien sitiu p’hasta cuarenta persones pa cenar cada día pela nueche, nun comedor que ta fechu de muries de mediu metru d’ancho. L’enfoque culinariu ye crear una esperiencia gastronómica escelente gracies a los productos de la zona de calidá buena, poniendo interés especial na captura sostenible de la vida silvestre. El danés Nicolai Ellitsgaard, del restaurán Måltid en Kristiansand, de tanta sonadía, ye’l xefe cocina, que lleva un equipu internacional de dieciséis persones con esperiencia nos meyores restaurantes que saca la guía Michelín.
Leave a Reply