Anguaño, el podiu del concursu Indumentaria, que se celebró’l domingu 30 de septiembre en Grau, destacó pola variedá na tipoloxía y orixe xeográficu de los traxes premiaos. Asina, el primer premiu na categoría «Home» llevólu David Fernández Fernández, que vistió un traxe de marineru recuperáu en Candás gracies a los trabayos que fixeron nos años 90 el Grupu de Baille San Félix, Fini Suárez y Gausón Fernandi. Na categoría «Muyer», al contrario, el xuráu premió un traxe de gala del oriente sacáu d’una fotografía de Baltasar Cué de 1880 –qu’esta vez llució Laura Martínez García– y con saya y chaquetilla confeccionaes en tafetán morao escuro.
Los segundos premios fueron pa Jesús Manuel Villanueva Rodríguez y Ana Isabel Pérez Santano. Él participó nel concursu con un traxe del centru fechu n’estameña y con botones de madera, con chamarreta y chaqueta del mesmu xéneru, el más habitual ente les clases campesines asturianes de la segunda metá del sieglu XIX. Pela so parte, Ana Isabel Pérez llució un traxe de marinera compuestu d’una saya cosida en tela de sacu en dos tonos acompañada d’un mandil ampliu pal llabor, una chambra d’algodón con rayes azules y un mantu encarnáu con dibuxos en blanco, amás del pañuelu, imprescindible, pa cubrir la cabeza.
Completaron el cuadru d’honor d’esta tercer edición d’Indumentaria Pedro Pangua Rivas y Rocío Fernández Collar, que llevaron el tercer premiu del xuráu. El modelu que llució Pedro Pangua taba basáu nun traxe de transición recoyíu nel llugar d’Insierto (Mieres), caracterizáu polos pantalones llargos y el sombrero d’ala, en cuenta del calzón curtiu d’époques anteriores y la montera. Rocío Fernández llevó a los asistentes, cola so indumentaria, hasta la zona suroccidental d’Asturies, al vistir un traxe compuestu con dellos elementos confeccionaos na actualidá pero con xéneros antiguos y reproduciendo de manera fiel, en corte, diseñu y adornos, los traxes tradicionales de la zona canguesa.
Nesta ocasión, el xuráu formáronlu los espertos n’indumentaria tradicional Ana Villanueva, Consuelu Ríu, Constantino Menéndez y Amadéu Benavente, que tuvieron la oportunidá de contemplar los traxes en dos ocasiones: la primera, al principiu de la mañana, y la segunda, depués de que caún de los 48 participantes nesta edición del concursu desfilara énte les más de trescientes personas congregaes na Plaza los Dolores de Grau.
Depués de conocese los premios, la fiesta treslladóse a la Plaza de la Panerina, onde Xosé Antón Fernández ‘Ambás’ armó una danza na que participaron non solo los concursantes nel certame, sinón toles persones que quixeron entrar, fueren o non vistíes col traxe tradicional. Pela tarde, la danza y el baille siguieron na Plaza’l Mercáu, animaos pola música en directu del quintetu de pandereteres Herbamora; la voz de la panderetera Leticia González, de Baselgas (Grau); la gaita y el tambor de Santi Galguera y Manolín El de Parres, y, pa zarrar, los pandereteros Cantaruxare, el grupo que formen Xosé Antón Fernández «Ambas», Ramsés Ilesies y Paulino Santirso.
La participación tan alta tanto de concursantes como de públicu –la mayor de les tres ediciones del Día’l Traxe’l País y el concursu Indumentaria– fai qu’esta fiesta se consolidara yá como una de les cites principales del calendariu festivo no solo del conceyu de Grau, sinón tamién de tolos amantes del traxe tradicional asturianu. Igualmente, ta valiendo pa que cada vez más persones garren conciencia de la importancia cultural que tien conservar una forma de vistir que, coles sos peculiaridaes xeográfiques y sociales, caracterizó a los asturianos y les asturianes dende, polo menos, el sieglu XIX.
Leave a Reply