Luis Fernández (Uviéu, 1900 – París, 1973) ye l’autor de la obra invitada d’esta temporada del Muséu de Belles Artes d’Asturies, con un retratu que vien cedíu pol Muséu Reina Sofía de Madrid. La obra representa a un home que ta sentáu nuna siella coles piernes cruciaes, en posición de tres cuartos, y recortáu contra un fondu que, pa la metá de la esquierda, ta a escures y, pa la metá de la derecha, entra un poco la lluz. El paisanu tien nes manes una viola, que tien namás una de les cuatro cuerdes, lo que, p’Alfonso Palacio, director de la pinacoteca asturiana, «puede interpretase en clave de simbolismu masónicu porque’l pintor Luis Fernández yera, desde 1927, de la loxa Fraternité, que pertenecía al Grand Orient de Francia». El retratáu ta nuna postura mui escenográfica y tien los güeyos bien abiertos pero cola mirada perdida, nun puntu de pa fuera’l cuadru, y ta a lo d’él. Al ponelu nesa situación, vese l’arte que tien el pintor pa crear una obra mui intensa que ye quién a recoyese en sí.
Los contornos de la figura y de los elementos de la obra tán bien marcaos con una raya negra bien fina, qu’enseña lo bon dibuxante que yera Luis Fernández. La frialdá de la gama los colores aumenta l’aire señaldosu de la pintura. Los grises y azulaos y la descomposición en planos xeométricos del retratáu permiten colocar esti cuadru na llinia d’esa estética postcubista que foi bien común na mayor parte de la producción pictórica de Fernández de depués de la segunda guerra mundial.
En palabres d’Alfonso Palacio, pa Philippe Le Bret –fiascu del pintor español–, aunque Luis Fernández tenía una debilidá grande por proyectar la fisonomía d’él sobre los rasgos de les persones que retrataba, esta obra nun puede tenese por un autorretratu en sentíu estrictu. Trátase más bien d’un retratu que Fernández-y fixo a un compañeru de la imprenta parisina onde trabayó como cromista dende mediaos de los años venti hasta primeros de los trenta, que s’apellidaba Szwarc, y que foi coleccionista d’obres d’él. Esti home foi tamién el protagonista de delles anamorfosis que Luis Fernández pintara ente 1934 y 1936 y, n’especial, de la que se conserva nel Muséu de Belles Artes d’Asturies y na que, sometida a una contracción llonxitudinal del espaciu pictóricu, apaez la mesma figura, tamién sentada, y col mesmu instrumentu musical nes manes que’l qu’apaez na obra invitada. Lo único que cambia ye la mayor intensidá de la paleta cromática, porque na anamorfosis a hai coloraos, verdes, naranxes y mariellos. Hai que tener en cuenta que l’anamorfosis foi la carta de presentación de Fernández como pintor dientro del denomináu movimientu dimensionista de 1936.
Luis Fernández ye ún de los creadores asturianos y españoles más importantes del sieglu XX. Depués de marchar pa París nel 1924, Fernández contactó allá colo meyor de la vanguardia internacional, y eso valió-y pa conocer y metese en dellos de los movimientos artísticos más importantes daquella, como’l surrealismu o el cubismu.
La obra va poder vese hasta’l 17 de febreru de 2019 na sala 22 del Edificiu l’ampliación na Plaza d’Alfonso II el Castu 1 d’Uviéu.
Leave a Reply