El Centru Comunitariu The Exchange ta nel cogollu central de Sydney (Australia), en Darling Harbour. L’oxetivu d’esta obra recién estrenada yera llevantar un edificiu de poques plantes, suave y cálidu, que casara cola plaza u ta, enfrente d’edificaciones de muncha altura, y diera serviciu pa la zona de guardería, mercáu, hostelería y biblioteca pública.
La fachada ye una espiral de madera que da solombra pa dientro y que fai que les vistes que dexa ver p’afuera cambien en tol contornu y pa cada pisu. Gastaron nella 20 kilómetros de tables de madera tratao con un sistema patentáu que se llama Accoya –que consigue que la madera nun pudra y que ta garantizao pa 50 años–.
L’edificiu, que firma l’estudiu del arquitectu xaponés Kengo Kuma, quier ser como un ñeru de páxaru en grande y convertise nel iconu nuevu de la ciudá. Esta primer obra de Kuma Australia foi encargada como un contenedor qu’emburrie la cultura de les startups en Sidney y, por eso, inclúi una parte dedicada a valir pa makerspace, o espaciu amañosu p’andechar la xente y pa cambiar colos demás les idees, el trabayu y los recursos o tamién pa facer actividaes educatives, tener asesoramientu d’espertos, facer eventos, charres y talleres que tengan que ver cola creatividá y la invención nuna materia cualquiera.
Kengo Kuma ye de los arquitectos más respetaos del mundu y ye’l que firmó dellos de los edificios más escepcionales d’esta dómina, como’l Muséu d’Arte Suntory de Tokio (Xapón), la Bamboo Wall House de China o’l Centru d’Arte Besançon de Francia. La filosofía del trabayu d’esti home ye ser quién a topar la manera d’avanzar de la que s’entienden los valores del pasáu, asegurando un vínculu firme col sitiu, cola naturaleza, cola cultura y cola historia d’onde s’edifica.
L’equipu del proyectu son: Yuki Ikeguchi, Marc Moukarzel, Diego Martin, Mira Yung, Laura Sandoval Illera y Taylor Park.
Leave a Reply