Ye conocida como una de les bandes más potentes pal directu de Dinamarca. The Minds of 99 arrasen ente la mocedá del país nórdicu, cantando en danés a ritmu de post-punk. Los componenetes son cinco y son amigos dende pequeños. Dende qu’entamaron como grupu nel añu 2012 lleven sacaos un EP y dos discos. El primer éxitu que tuvieron foi’l cantar «Det er Knud som er død», basáu nun poema que fixo’l periodista y escritor danés Tom Kristensen sobre’l científicu y héroe nacional Knud Rasmussen. La canción llegó a los puestos más altos de les llistes de lo más escuchao.
Los años fueron pasando y los cinco mocinos fueron medrando hasta facese mozos fechos y derechos. Les canciones de The Minds of 99 falen de lo que ye vivir ensin preocupaciones, querese o’l camín al que lleva la droga. Tamién falen de los héroes o faen retratos xeneracionales. «1,2,3,4» ye la primer canción que saquen n’inglés, con un tratamientu de la voz más electrónicu. Pal 2020 van sacar discu completu.
Leave a Reply