The 451 Shop va ser un espaciu pal arte y pal diseñu onde van tar xuntes pieces artístiques y oxetos de diseñu fabricaos d’una manera tradicional, con conciencia y sostenible. Tamién hai pieces d’artesanía, llibretes y cuadernos, pañuelos, llibros, discos, ropa y complementos en tiraes pequeñes y, en munchos casos, pieces úniques.
Nuna zona del Uviéu Antiguu onde va trenta años cuasi nun hai más que bares de copes abre un espaciu nel que van colingar obres 19 muyeres: María Álvarez, Fernanda Álvarez, Patricia Cayón, Breza Cecchini, Maite Centol, Mónica Dixon, Sara Ezquerro, Marta Fermín, Carmen González, Mabel Lavandera, Begoña Muñoz, Natalia Pastor, Teresa Patiño, Blanca Prendes, Elena Rato, Jezabel Rodríguez, Chelo Sanjurjo, Consuelo Vallina y Susana Villanueva. Esta esposición colectiva titúlase Diversas.
El nome de The 451 Shop sal de Farenheit 451, la novela de Ray Bradbury que depués la rodó en cine François Truffaut, porque encaxa mui bien cola filosofía de la tienda: conservar y promocionar l’arte, la cultura y el pensamientu. Amás, resulta que ye la temperatura a la que prende fueu’l papel.
Detrás del espaciu 451 ta Mónica De Juan, una artista fecha nos campos de la ilustración y la fotografía, amás de como comisaria d’esposiciones y de dellos proyectos que pudieron vese na Nueche Blanca d’Uviéu. Alredor d’esta galería y tienda van entamase actividaes culturales variaes como presentaciones, alcuentros y collaboraciones ente creadores de disciplines diferentes.
The 451 Shop naz p’ayudar a cambiar l’antiguu uvieín y rexenerar el texíu de comercios del cascu históricu.
Leave a Reply