La ciudá friulana d’Udine va acoyer, ente’l 30 de payares y el 2 d’avientu, la tercer edición del festival Suns Europe, l’alcuentru de creadores en llingues minorizaes más importante del continente. Anque l’apartáu musical ye’l más representativu d’esti eventu gracies al concursu de la canción en llingües minorizaes –que se va celebrar el sábadu 2’avientu, a les nueve de la nueche–, en Suns Europe hai muncho más que música. A lo llargo de los tres díes, van compartir el so trabayu bandes de música, cineastes, escritores y performers del País Vascu, Gales, los Grisones (Suiza), Bretaña, Galicia, Baxa Saxonia, Occitania, el país Sami, Irlanda, Cerdeña y la república rusa de Buriatia (cerca de Mongolia), amás de los del país anfitrión, Friul, nel norte d’Italia.
Esti ye’l tercer añu que Suns Europe axunta idiomes vieyos y formes de comunicación nueves nun festival fechu d’arte, contaminación cultural, talentu, pluralismu llingüísticu y creatividá. Como les veces anteriores, les actividaes del festival van desenvolvese principalmente nel Teatro Nuovo Giovanni d’Udine, onde se va poder oyer y ver música, teatru, cine y lliteratura espresaos en llingües minoritaries d’Europa entera.
Con esta tercer edición, Suns Europa confírmase como’l festival más importante na promoción de los idiomes minorizaos y, por eso, cuenta col apoyu del Conseyu d’Europa. El so oxetivu ye, como dende hai tres años, afalar la creación artística de calidá y amosar la diversidá llingüística d’europa como fonte de derechos. Con esti fin, cientos d’artistes van llegar a Udine pa crear una ‘Babel’ de llingües y un acontecimientu pa nun perdelu nin el públicu local nin toles persones de tol continente qu’esos díes pasen pela ciudá friulana.
Suns Europe ye un proyectu de la Cooperativa Informazione Friulana (responsable de la producción de Radio Onde Furlane) y Cooperativa Puntozero, col patrociniu d’Arlef (Agjenzie Regjonâl pe Lenghe Furlane – Axencia Rexonal pa la Llingua Friulana), la Rexón Friuli Venezia Giulia y la Fundación Friuli, en collaboración col Conceyu d’Udine, la Fundación Teatro Nuovo Giovanni y Babel Film Festival.
Leave a Reply