La fotógrafa catalana Laura Cuch ta acabante de presentar el llibru Spiritual Flavours (Sabores espirituales), un volume qu’axunta recetes de cocina de xente que pertenez a comunidaes relixoses mui estremaes pero que viven nel mesmu vecindariu, na parte occidental de Londres. Estes comunidaes axúntense alredor d’una sinagoda, un templu indú, una mezquita, un gurdwara sikhi, una ilesia anglicana, una ilesia católica romana de feligresía multicultural, una ilesia católica onde la mayoría de los fieles son polacos y una ilesia pentecostal.
Les recetes que s’alcuentren nel llibru escoyéronse pol so significáu espiritual –la fe y la comida tán mui rellacionaes la una cola otra–, al mesmu tiempu que dan pa mostrar la diversidá cultural tan grande que se puede atopar anguaño na zona suburbana de Londres. El volume organízase en secciones centraes nes persones o families qu’aportaron les recetes y nelles, amás de les indicaciones pa preparar cada platu, inclúise un testu sobre la vida o historia de caúna d’elles. L’apartáu fotográficu abarca dende imáxenes de la preparación de la comida a retratos, pasando per fotografíes del interior de les cases o de les práctiques relixoses de los miembros de cada comunidá, too ello col envís de afondar nes rellaciones ente la comida y la espiritualidá y cómo estes inflúin na vida de les persones.
El llibru forma parte d’un proyectu d’investigación mayor, nel que, al traviés d’entrevistes y sesiones de cocina con delles comunidaes relixoses de les árees d’Ealing y Hanwell, en Londres, les persones participantes ponen l’atención nes conexones emocionales y afectives de les persones cola comida, al mesmu tiempu qu’esploren idees sobre herencia, tradición y creyencia. Toa esta investigación va quedar rexistrada tanto nel llibru que se presenta agora como nun curtiumetraxe.
Laura Cuch ye una fotógrafa, realizadora de cine y investigadora del departamentu de xeografía del University College de Londres, onde trabaya actualmente nes conexones ente comida, fe y vida cotidiana de comunidaes relixoses bien estremaes. Enantes d’esta investigación, Cuch esploró la representación de les xeografíes urbanes y les rellaciones ente fotografía, salú, el cuerpu y el procesu de suxetividá. Frutu d’esti trabayu fueron les esposiciones Sense Son (Ensin sueñu), pa la que trabayó con persones que, por delles razones, duermen mui poco, y Trans, onde retrató xente con dalgún muérganu tresplantáu y contó los cambios qu’esa esperiencia produció nes vides d’eses persones y cómo afectó a la so identidá.
Leave a Reply