Poner daqué pela cabeza, pa tapase, enchipase o remarcar un estatus especial ye tan antiguo como’l mundu. A partir del sieglu XIX y del XX, amás, los sombreros tamién s’usaron pa macar les diferencies de xéneru. Los de paisanu quedaron delimitaos a unos diseños mui estrictos, pero los de muyer tuvieron tola llibertá pa cambiar y innovar hasta’l deliriu. Pa les muyeres tamién se fixeron sombreros del estilu de los de paisanu, pero nun se fixo lo mesmo al revés. Los códigos de vestimenta de la sociedá nunca dexaron xugar col papel de los homes pa nun tocar el terrén prohibíu de l’ambigüedá sexual.
Amás de valir pa tornar el sol, l’aire y el fríu, los sombreros tienen un aquel simbólicu y estéticu. La esposición Chapeau! De Casas y Picasso a Balenciaga y Pertegaz, propón una mirada al mundu de la moda y tamién del arte nel que sombreros y tocaos d’home y de muyer son los protagonistes. Les pieces que s’enseñen –cuarenta masculinos y dos centenares femeninos– son fondos de la colección d’Antoni de Montpalau, que ye una de les más representatives d’España. La mayoría fabricáronse en Barcelona, que yera la que marcaba la moda gracies a la importancia de la industria textil y a siguir muncho lo que pasaba en París.
La muestra tamién tien una parte dedicada a obres d’arte onde los retrataos gasten esti complementu o a creaciones nes que los sombreros en sí garren l’atención de los pintores. Puen vese obres de Picasso (sobre manera bocetos y dibuxos) y d’otru pintor grande nel qu’influyó muncho: Ramón Casas. El grupu Dau al Set, formáu pa finales de los años cuarenta del sieglu pasáu por Joan Ponç, Joan Brosa, Antoni Tàpies y Modest Cuixart tamién ta representáu. Ellos convirtieron los sombreros nuna enseña particular. Nes obres d’ellos namás apaecen sombreros d’home y con una simboloxía concreta, por exemplu, la chistera refierse al poder o a les perres o al diañu.
Cola llegada del Pop-Art y la Figuración Nueva, nos años sesenta del sieglu XX, los sombreros volvieron tener protagonismu na pintura. Na esposición puen vese obres del Equipu Crónica (que formaben Rafael Solbes, Manolo Valdés y Juan Antonio Toledo) con unes creaciones que tienen influencies de la publicidá y el cine. Tampoco falten les pintures d’Eduardo Úrculo y d’otru Eduardo, Arroyo.
Chapeau! De Casas y Picasso a Balenciaga y Pertegaz pue vese na Sala d’esposiciones del Bancu Sabadell Herrero, d’Uviéu, hasta’l 12 de xineru del 2020.
Leave a Reply