Sofía Bonati ye una ilustradora arxentina, que nació y medró en Buenos Aires, fía d‘un matrimoniu d‘artistes. Como-yos pasa a munchos creadores, Sofía estudió una carrera universitaria d‘una disciplina que nun tien nada que ver col arte, nel casu d‘ella, xeoloxía. Depués de dar les vueltes que tien la vida, acabó como dibuxanta. Anguaño vive na Inglaterra, onde trabaya pa ella como ilustradora.
La obra de Bonati representa mayormente retratos de muyeres, cola cara realista, arrodiaes de mundos con muncha fantasía. Dibuxa con llapiceru, acuareles, tinta y rotulador. La última serie que publicó nel porfolio d‘ella titúlase A-maze-ing girls, y ta compuesta d‘ocho retratos de muyeres mui moces, de mirada inocente y que representen unos rasgos canónicos de belleza eslava. Les moces tan toes arrodiaes d‘enguedeyos y llaberintos que-yos nacen de la cabeza y que-yos tomen tol cuerpu –menos los brazos y les manes– y tamién el fondu de les obres, hasta mezclase los dos. El resultáu ye una obra que llama a mirala, intrigante y hipnótica.
La proporción de los cuerpos, altos y delgaos, y la inclusión d‘aureoles alredor de la cara de les retrataes faen que la referencia a los iconos relixosos bizantinos tea presente y tamién lo tea la influencia del movimientu secesionista vienés. Nun ye difícil atopar ciertu parentescu ente les ilustraciones de Sofía Bonati y les muyeres que representó’l pintor Gustav Klimt, o tamién con munches otres representaciones de les ilustraciones publicitaries, los estuches y envoltorios del Modernismu.
Leave a Reply