Un plasmu visual: con Generation Wealth(Xeneración rica), Lauren Greenfield consigue crear un documentu únicu qu’enseña’l consumismu llocu de les décades últimes nel mundu occidental, que ta cada día más obsesionáu col suañu de vese guapu y ricu a toes hores.
La fotógrafa y documentalista americana del norte, Lauren Greenfield (1966) creció na clase media de raza blanca estaounidense que teníen a gala’l ser trabayadores, educaos y llamar poco l’atención. Cola serie fotográfica Generation Wealth, echa-y un güeyu, que lo diz too, a los 25 últimos años de cultura del consumu a lo xole que, pa l’artista, camudó los valores de la clas media pa entregase al materialismu puru y duru, a la cultura de la xente famoso y al narcisismu descaráu.
La esposición nun trata del ún por cientu riquísimu de la población o sobre’l mundu de les finances y la banca; más bien trata, como diz Greenfield, de cómo’l cuerpu, la mocedá, la sexualidá y el «paecer ricu» se convirtieron nos valores de los nuestros tiempos. Enseñar lo que ta detrás d’esi sistema capitalista ye la misión verdadera de la muestra. Pa consiguilo, usa les armes de cualquier documentalista, les imaxes y les entrevistes que-y valen pa enseñar una dómina de consumu como nunca se viera primero.
Greenfield tamién se tien preocupao en trabayos anteriores pola mecánica qu’usen les marques comerciales p’atrapar a los rapazucos y rapazuques de la qu’empiecen a espolletar como consumidores. Y anque’l conocimientu d’esta tendencia nun ye cosa nueva pa los sociólogos y pa los economistes, nes manes de Greenfield, de sópitu, faise mui palpapable y resulta que nos dexa plasmaos coles imaxes.
Generation Wealth
Muséu Louisiana
Humlebæk, Dinamarca
Hasta’l 8 de marzu del 2020
Leave a Reply