Sam Fender ye nuevu nel mundu de la música. Esti compositor, cantante y guitarrista de venticinco años acaba de llegar el mes de setiembre pasáu al númberu ún de les llistes del Reinu Xuníu col primer discu, que se titula Hypersonic Missiles. La carrera arrancóla va un añu, de teloneru de Bob Dylan y Neil Young, ná menos. Dicen que la receta del éxitu del rapaz ye, per una parte, el color dramáticu de la voz que tien y, per otra, apostar por un estilu de pop británicu clásicu, que ye familiar y enllena estadios cuando se programen conciertos.
Hai quien valora que Sam Fender suene más auténticu, más real y tenga un inglés con acentu (del noreste del país) y que se salga de lo que xenera la industria de la música ensin parada, too igualadino y de llibru.
Ente les influencies de los cantares de Fender pue vese la solombra d’un xigante: Springsteen. Polo que respecta a la temática de los cantares, traten de temes serios como’l suicidiu na mocedá, el patrón de masculinidá, les redes sociales o’l sexismu. Hypersonic Missiles ye un discu d’arranque mui correctu, que nun inventa nada pero que nun fai nada mal y enseña que tien detrás un músicu con munchu recorríu.
Leave a Reply