Salíi bichos a la danza

Planeta’l mesmu, destín el mesmu, un viaxe llargu xuntos ye’l títulu d’una instalación del ilustrador Philip Giordano que ta colingada en Taipéi. Los dibuxos representen animales de toles clases que se dan les manes, rescamplando que toos viaxen pel planeta, que ye la casa d’ellos, y que tamos toos xuntos nél. La idea conceptual ye cenciellina: tolos seres vivos tan rellacionaos. La gracia ta na visión del artista, na manera que tien de figurase él toles especies con personalidaes, colores y formes infinites. La colección d’animalinos garraos de les pates ocupa una muria de 400 metros que zarra’l solar onde se va llevantar la Torreta Fubon Xinyi A25, au van poner el Muséu d’Arte Contemporaneu Fubon, que va llevar la firma del arquitectu Renzo Piano.

Dende qu’echó a andar en 1997, la Fundación Arte Fubon ta manteniéndose fiel a la idea orixinal que la inspirara: patrocinar y promover l’arte y facer una realidá la educación artística en Taiwán, de la qu’elevaba la calidá de la cultura de manera repartida. Al entamar conferencies, esposiciones, actuaciones, actividaes, investigaciones, seminarios y publicaciones, la Fundación fai que lleguen a la sociedá les tendencies últimes en cultura y estética contemporánea. Tamién fai un llabor bonu premiando a artistes nuevos y entamando intercambios culturales y artísticos internacionales. La Fundación pertenez a una matriz, la compañía Fubón, que se dedica a les finances, inversiones y a facer seguros.

Planeta’l mesmu, destín el mesmu, un viaxe llargu xuntos créase y enséñase dientro’l festival «Very Fun Park», que lleva años siendo una ferramienta fundamental pa difundir en Taipei la idea del arte na cai, del «muséu ensin paredes», lo que valió pa llenar les víes más transitaes de la ciudá d’arte y de diálogu ente la ciudadanía y les obres.

L’illustrador Philip Giordano ye nacíu nuna ciudá piquiñina de la Liguria, n’Italia, fíu de madre filipina y padre suizu. El rapaz ye mui corredor y anda camín del mundu enteru. Esta temporada vive y trabaya pa Tokio, dibuxando pa delles revistes y editoriales. Mayormente dibuxa llibros pa rapacinos y crea xuguetes y animaciones. Dellos trabayos d’él fueron bien premiaos a nivel internacional. Col arte col qu’usa les formes, los colores y la delicadeza de les testures nun ye pa menos. Garrada de les manes, tola fauna dancia unida.