El MUSAC (Muséu d’Arte Contemporaneu de Castiella y Llión) inaugura’l 3 d’avientu una esposición sobre los más de trenta años de la revista Veneno, una publicación de poesía visual experimental que, baxo la dirección del pintor, autor de poemes visuales y recitador fonéticu Francisco Aliseda, convirtióse nun referente de les tendencies más vanguardistes nos años ochenta y noventa del sieglu pasáu.
Nacida en Palencia nel añu 1983, de la mano del propiu Aliseda y los poetes Egidio Huerga y Secundino Naves, la revista Veneno manifiesta, yá dende’l primer númberu, un interés mui fondu pola poesía y les víes d’espresión nueves. Dende’l principiu, la forma de producción foi siempre collaborativa, lo que permitió que, dende 1983 hasta anguaño, s’imprimieren nes sos páxines obres d’una llista grandísima d’escritores y artistes visuales tanto españoles como estranxeros, ente los que se pue citar a Gustavo Martín Garzo, Esperanza Ortega, Olvido García Valdés, Eduardo Milán, Antonio Gamoneda, Alberto Díaz Villaseñor, Rafael de Cózar, Pablo del Barco o Antonio Gómez.
Exemplu d’esta manera de trabayar ye la forma como se creó’l númberu de xineru de 1986, tal como lo cuenta l’escritor, traductor y críticu lliterariu Luis Marigómez nel llibru qu’editó’l muséu llionés como complementu de la esposición:
«Hubo una acción na Casa Revilla, daquella centru d’espansión cultural en Valladolid, que consistía n’ellaborar un númberu de la revista ellí mismo y entregalu a los asistentes, que tamién diben escribir los poemes, enantes de qu’acabara l’actu. La maqueta básica, un foliu dobláu en cuatro partes, nun podía ser más cenciella. P’aquella ocasión, el pintor Manuel Sierra dibuxara un par de culiebres, una en cada cara, p’abellugar los testos. Firmó con un heterónimu de guerra: “Miguel, hermano de Mano Negra”. Tres de les instrucciones, el públicu ellaboró a la carrera los versos y entrególos. Olvido García Valdés fixo una escoyeta rápida, dalguién mecanografió les lletres y púnxoles nel foliu. Los autores quedaben nel anonimatu. Darréu, fixéronse fotocopies. Una entrega d’una revista de poesía ellaborada nun tiempu record.»
Esti testu val tamién pa entender, d’una güeyada, lo que ye la poesía visual, una forma d’espresión artística que se caracteriza, básicamente, pola combinación de palabra y imaxe. Si se da un pasu más, pue vese tamién como un encruz ente pintura, música, poesía y artes visuales, de manera tala que la poesía visual ocupa un espaciu híbridu dientro del mundu del arte. Siguidora fiel d’estes premises, la revista Veneno ye ún de los proyectos con un caláu más fondu y una trayectoria más llarga nesta disciplina, dalgo de lo que dan fe los 185 númberos editaos hasta la fecha y que se van poder ver nel espaciu «Vitrinas» del MUSAC hasta’l 14 de mayu del 2017.
Repasar los 185 númberos de la revista supón contemplar la evolución de la poesía visual nel Estáu español, amás de conocer les aportaciones de caún de los escritores y artistes que collaboraron a lo llargo de los 33 años d’existencia de la publicación, creadores que dexaron constancia, nes sos páxines, de los esmolimientos y les investigaciones poétiques, artístiques y editoriales d’una época.
Dende un puntu de vista formal, Veneno ye una revista ensamblada de formatu foliu –primero– o DIN A4 –tres de la xeneralización d’esti estándar–, d’ocho páxines, compuesta, na mayor parte de los sos númberos, a base de manipulaciones manuales y cola inclusión de detalles orixinales, lo qu’esplica les tiraes curties que se facíen de cada númberu, normalmente d’unos 500 exemplares. Nesti sen, destaca’l númberu que recueye los poemes de José-Miguel Ullán (Villarino de los Aires, Salamanca, 1944 – Madrid, 2009), qu’él mesmu s’encargó d’ellaborar y que, como recueye Luis Marigómez nel llibru de la esposición, taba «impresu nun papel espléndidu, a delles tintes. […] Tolos exemplares taben numberaos y sellaos cola firma d’él y la seña dactilar. El poema visual integrábase nel diseñu como nunca enantes».
La esposición, amás d’una oportunidá pa ver xoyes editoriales como esta, va ser ocasión de sumar un númberu más a la serie, el 186, que s’edita específicamente con motivu d’esti proyectu del MUSAC y que va contar cola collaboración del narrador vallisoletanu (anque afincáu nel País Vascu) Luis Cancho. Esta collaboración va suponer la inclusión na revista, pela primer vez en 33 años, d’un rellatu breve.
Leave a Reply