Les persones que quieran ver, nel Muséu de Belles Artes d’Asturies, la esposición Imago Urbis. Les ciudaes españoles vistes polos viaxeros (sieglos XVI-XIX) tienen de plazu hasta’l 23 de xunu. Nesta muestra faise un recorríu peles vistes de ciudaes qu’empieza nel Renacimientu y el Barrocu y acaba cola fotografía urbana del sieglu XIX, pasando pela Ilustración y la mirada de los viaxeros románticos.
Nos sieglos XVI y XVII, autores de la talla de Braun, Münster, Lavanha, Colmenar o Texeira empiecen a esperimentar cola perspectiva nes representaciones de les ciudaes de la época, tovía a mediu camín ente la urbe medieval y la ciudá moderna. L’espíritu de la Ilustración va dexar una marca permanente nel diseñu de les ciudaes, tanto a nivel d’edificaciones como, sobre manera, de planeamientu, col diseñu de los primeros ensanches urbanos. D’esta transición van dexar testimoniu colos sos grabaos y dibuxos nomes como Villanueva, Ponz, Laborde, Bradford, Murphy y Brambrila.
El sieglu XIX va ser el tiempu de los viaxeros románticos, ente los que s’alcuentren artistes como Locker, Lewis, Roberts, Gail, Vivian, Girault de Prangey, Doré y, por supuesto, Pérez Villaamil, que van treslladar la so mirada nostálxica –y tendente munches veces a la recreación fantasiosa– nes sos obres. Al final d’esi sieglu, el grabáu y la tinta van dexar pasu al protagonismu –y la fidelidá– de la imaxe fotográfica, sobre manera al traviés de la figura de Charles Clifford y los primeros viaxes en globu, con Guesdon a la cabeza. La reproducción fotográfica en serie va de la mano de la espansión industrial burguesa y, entrambes les dos, van tresformar –física y emocionalmente– la percepción de la ciudá tradicional –pa facese una idea, ye abondo con pensar nos cambios pelos que pasó una ciudá como Uviéu ente les últimes décades del sieglu XIX y les dos primeres del XX–.
P’amosar esti viaxe cronolóxicu y xeográficu, la esposición Imago Urbis cuenta con más de cien obres, ente fotografíes, dibuxos, acuareles, llibros ilustraos, óleos y estampes. Al traviés d’ellos, les persones que la visiten van poder averase y analizar la imaxe artística de les ciudaes españoles dende’l sieglu XVI hasta l’aparición de la fotografía nel últimu cuartu del sieglu XIX. Los comisarios de la esposición –los catedráticos de les universidaes de Cantabria y Uviéu Luis Sazatornil y Vidal De la Madrid– contaron pa ello col fondu de llibros de viaxes ilustraos que guarda’l Muséu de Belles Artes d’Asturies, pero tamién colos procedentes de la Biblioteca de la Universidá d’Uviéu, la Biblioteca d’Asturies «Ramón Pérez de Ayala», la colección d’obra gráfica de la Universidá de Cantabria, la Biblioteca Menéndez Pelayo, l’Archivu Lafuente y delles colecciones particulares.
Imago Urbis. Les ciudaes españoles vistes polos viaxeros (sieglos XVI-XIX)
Muséu de Belles Artes d’Asturies. Planta baxa, Palaciu de Velarde.
Hasta’l 23 de xunu.
Leave a Reply