Preséntase nel Belles Artes ‘Procesión en Covadonga’, la obra invitada de Pérez Villamil

Dientro’l programa «la Obra Invitada», que permite enseñar nel Belles Artes pintures, escultures o pieces artístiques procedentes d’otres colecciones, va poder vese nel muséu uvieín Procesión en Covadonga, 1851, un oleu sobre llenzu, de 131×181 cm, que pintara Genaro Pérez Villamil (Ferrol, 1807 – Madrid 1854). L’autor foi’l paisaxista más importante del Romanticismu español y na obra d’él plasmó munchos sitios históricos y monumentales. Villaamil tuvo n’Asturies en tres ocasiones y quedó mui impresionáu con Cuadonga. En tiempos d’Isabel II, esti sitiu tuvo munchu protagonismu y el cuadro que nos visita formó parte d’una serie fecha pa la reina. Nesti sen, ye significativa la inscripción «Conmemoración de la batalla de Covadonda y el origen de la monarquía española», que s’atopa na esquina inferior derecha del llenzu.

La pintura retrata la guapura natural del sitiu, les construcciones qu’había alredor de la cueva –mui diferentes de les d’anguaño– y munchos personaxes que van a la romería y ven la procesión. L’artista fixo bocetos dibuxaos del natural y, depués, remató’l trabayu en Madrid, un añu más tarde. La obra ye tamién una bona fonte d’información sobre la indumentaria de la época. Na pintura, vese muncha influencia de la pintura británica, polos colores, pola representación d’una naturaleza brava y pol tratamientu fantásticu de les edificaciones.

Procesión en Covadonga, 1851 ye una obra que pertenez a les Colecciones Reales del Patrimoniu Nacional Español y ye la segunda vez que se pue contemplar colingada nel Belles Artes, au va tar espuesta hasta marzu del añu qu’entra. Nesta ocasión, la pintura ta restaurada y enseña tol esplendor, riqueza y frescura de colores. Na colección del muséu asturianu tamién puen vese otres obres d’esti pintor, como La Cueva de Covadonga y un interior monumental: La iglesia de San Juan de Amandi. Tamién de Pérez Villaamil ta previsto que s’incorpore a los fondos de la pinacoteca asturiana la obra Procesión ante la Catedral de Oviedo, procedente d’una donación de la colección de Plácido Arango Arias.

La presentación, que va ser el xueves 23 de payares, a les 18:00 hores, va contar cola intervención de José Luis Díez, director del Muséu de les Colecciones Reales y ún de los mayores especialistes en pintura del sieglu XIX. Como actividá paralela ta prevista tamién la conferencia, el 30 de payares, del xefe del Área de Conservación de Pintura del sieglu XIX del Muséu Nacional del Prado, Javier Barón.