Paquita Suárez Coalla: «Quería reflexonar dende dientro y ensin victimismos sobre por qué les escritores nun tamos au quixéramos tar»

HENRIQUE G. FACURIELLA
Paquita Suárez Coalla (Grullos, Candamu, 1965) ye la coordinadora de l’antoloxía de muyeres narradores Hestories pa contales (Más nomes de muyer), que publicó anguaño la editorial Trabe. Nesti volume, alcontramos diecisiete de los nomes femeninos más importantes de les nuestres lletres, qu’aporten una mirada sobre los temes universales «más nueva y fresca». Son los de Carmen Gómez Ojea, Aurora García Rivas, María Esther García López, Montserrat Garnacho Escayo, Cristina Muñiz Martín, Esther Prieto, Lourdes Álvarez, Consuelo Vega Díaz, Maite G. Iglesias, Berta Piñán, Pilar Arnaldo, Marta Mori, Paquita Suárez Coalla, Marisa López Diz, Paula Pulgar Álves, Iris Díaz Trancho y Laura Marcos. Nel añu 1995, Súárez Coalla yá participara na primer antoloxía d’estes característiques n’asturianu (Muyeres que cuenten), que coordinó Antón García y cola que se dieron a conocer como narradores munches de les autores qu’anguaño son una referencia del xéneru, como Chelo Vega, Esther Prieto o Berta Piñán.

–¿Por qué una antoloxía de muyeres narradores?
–La idea xurdió hai cuatro o cinco años falando con Marta Mori y Esther Prieto, editora de Trabe, sobre la lliteratura n’asturianu y, particularmente, sobre la lliteratura de les muyeres qu’escribíen nesta llingua. Preguntábamonos si, en verdá, la situación de les escritores taba normalizada o non y la mio opinión, y tamién la d’elles, yera que los nomes de muyer que se diben faciendo un furacu nel mundu de les lletres tovía yeren pocos. Había tiempu que yo llevaba mirando con llupa publicaciones, premios, xuraos de premios, crítiques lliteraries… ensin alcontrar la visibilidá que se dicía que teníamos. Comenté-yos la posibilidá de facer otra antoloxía de muyeres narradores, nun exerciciu de continuidá cola que, nel añu 1995, iguara Antón García (Muyeres que cuenten) y abrimos una convocatoria que tuvo como resultáu esti llibru. Como tamién soi profesora, siento la necesidá de que la lliteratura s’organice pa tener una idea del estáu de la cuestión, y nesti sentíu, Hestories pa contales pue ayudar a dar cuenta de lo qu’agora mesmo ta pasando na narrativa asturiana escrita por muyeres. Una antoloxía, con toles carencies que cualesquier antoloxía va tener, nun dexa de ser un material de referencia abondo importante. Lo que yo quería, amás, yera reflexonar dende dientro, y ensin victimismos, por qué les escritores nun tamos tovía au quixéramos tar.

–¿Cuálos seríen los criterios polos que se diba poder dicir que la lliteratura qu’escriben les muyeres ta normalizada?
–Pémeque lo primero pa ver si se normalizó o non ye comprobar si algamemos una presencia numbérica equivalente a la presencia numbérica de los homes. Y, de momentu, eso nun pasa, sobre too na narrativa. Otra sería vese nuna tesitura na que nun se tuvieren que facer más antoloxíes de muyeres escritores pa, digamos, facenos ver; y qu’esapaecieren los númberos especiales de revistes dedicaos a nosotres y toos esos eventos que nos xuben a escena de manera ocasional –como pasó na Selmana de les Lletres d’esti añu– pa volver a arrequexanos una vez acaben.

–Na antoloxía de 1995 había siete escritores y nesta, diecisiete. Más allá de los númberos, ¿qué coses cambiaron d’hai venti años a ahora?
–Anque lo numbérico ye lo más obvio, comparto la reflexón que facía Antón García na primer presentación d’Hestories pa contales… de que toles muyeres que s’inclúin nella, moces y mayores, tienen yá una trayectoria lliteraria que nun teníen les de Muyeres que cuenten. Toes son autores publicaes, mentes que na antoloxía del 95, la mayoría nun tenía publicao nada y bien d’elles nin tan siquier escribieren un rellatu enantes de salir l’antoloxía. La mayoría de les autores que s’incluyeron entós siguieron escribiendo y munches formen parte de la nómina de l’antoloxía d’anguaño. Al principiu, paecíame que pasar, en venti años, de siete escritores a diecisiete yera mui poco pero empiezo a velo como un balance positivu porque, a pesar de que les autores que respondieron a la convocatoria fueron éstes, sé qu’hai más que tán escribiendo y que, poles razones que fueren, o nun quixeron o nun pudieron participar na antoloxía, o nun se les convidó porque nun sabíemos d’elles. Tamién ye verdá, y esi diba ser otru tema de reflexón, qu’hai munches más poetes n’asturianu que narradores.

–¿Qué notes caractericen la lliteratura qu’escriben les muyeres nestos últimos años?
–Lo que veo ye qu’hai una voz cada vez más personal. Yá nun tamos, por dicilo de dalguna manera, énte «los típicos temes de lliteratura asturiana» o «los típicos temes de muyeres», si ye que dalguna cosa asina existe. La temática ye abondo variada y topámonos con una bayura d’asuntos universales a los que nos averamos con una mirada de muyer, una mirada más nueva y fresca que-y faltaba hasta agora a la lliteratura. A la mirada, tenemos qu’añadir dellos temes que los homes, por razones obvies, nun podíen tratar ensin facelo dende afuera y, por ello, d’una manera más superficial. N’Hestories pa contales alcontramos los temes de la emigración, les rellaciones de pareya dende’l puntu de vista de la muyer, la guerra, l’abusu sexual… Otra cosa que voi notando, dende’l puntu de vista formal, ye la preferencia de les escritores poles narraciones en primera persona y por un tonu más intimista que’l de los homes.

–¿Hai una voz xeneracional? ¿Estrémense los rellatos de les mayores de los de les más moces?
–Nun ta tan claro y nun veo que lo cronolóxico sía tan determinante. Toes, mayores y moces, establecen un diálogu nuevu colo que ye la sociedá actual, y caúna failo, tamién, dende la edá y les esperiencies propies. Pero falar de xeneraciones na lliteratura aturiana, más nel casu les muyeres, ye complicao, sobre too si nos atenemos al únicu criteriu de la edá. Esther Prieto y Berta Piñán, por exemplu, pertenecen a lo que se conoz como la segunda xeneración del Surdimientu. Laura Marcos, la más moza de l’antoloxía, vendría a representar les xeneraciones más nueves, quiciás xunto a Marisa López, Paula Pulgar… pero llueu hai un númberu importante d’escritores que, por edá, podríemos pertencer a la xeneración de Berta, pero que nun entamamos a publicar hasta muncho depués, como ye’l casu de Marta Mori y el míu. Y Pilar Arnaldo, que tien un añu más que yo, publicó’l so primer llibru l’añu pasáu.