L’escritor ayerán Pablo Texón acaba de ganar la 24.ª convocatoria del Premiu Xuan María Acebal de Poesía n’asturianu gracies al poemariu Allumamientu –presentáu col seudónimu Bartleby– del que’l xuráu destacó la so «orixinalidá temática, la maña rítmica y la variedá estilística de los poemes, que permiten construir una voz poética singular pa reflexonar sobre la paternidá dende una concepción esperiencial».
Anguaño, el xuráu presidiólu’l director xeneral de Planificación Llingüística y Normalización, Fernando Padilla, y formáronlu los escritores Pablo X. Suárez –ganador de la edición anterior–, Aida Fernández Escudero, Marisa López Diz, Lourdes Álvarez y Xosé Miguel Suárez Fernández. Al gallardón, que ta dotáu con 3000 euros, podíen presentase poemarios de tema, xéneru y estructura llibres, escritos en llingua asturiana, con una estensión mínima de 500 versos, con tal de que fueren inéditos y nun tuvieren premiaos n’otros concursos.
Pablo Texón Castañón (Felechosa, 1977) ye profesor de Secundaria y collabora davezu con publicaciones como La Nueva España, El Comercio, Eventual, Lliteratura o Campo de los Patos. Tien ganao los premios de poesía Nené Losada Rico (2005) y Teodoro Cuesta (2007) y la so obra poética ta recoyida nos llibros Toles siendes, La culpa y la lluz y Media vida, esti últimu publicáu nel 2017 y onde recueye tola so producción poética publicada hasta esa fecha.
Les creaciones de Texón atópense tamién nos discos de dellos de los grupos y solistes más importantes de la escena asturiana, como Dixebra, Alfredo González, Verdasca o Toli Morilla, y ye tamién responsable de la versión asturiana de Xulia, del dramaturgu suecu August Strindberg –y que llevó a les tables la compañía Teatro Margen– y publicó nel 2013 una escoyeta de poemes de Raymond Carver traducíos al asturianu baxo’l títulu Un corte de pelo.
Leave a Reply