Ouka Leele, inédita

La esposición Ouka Leele Inédita axunta más de sesenta semeyes de la fotógrafa y pintora madrileña positivaes en blanco y negro y en color, pero nenguna revelada en blanco y negro y coloreada pola artista –que ye la técnica d’acabao pola que se fizo más famosa Ouka–.

La tipoloxía de les pieces recoyíes nesta antoloxía ye bien variada, pudiendo vese fotos publicitaries feches pa carteles promocionales d’obres de teatru o espectáculos musicales, bodegones, instantánees… pero, sobremanera, retratos y autoretratos. La temática ye tamién perestremada, anque predomina la presencia de personaxes femeninos, cuándo desnudos cuándo non, siempre sensuales, suxerentes y provocativos, xugando colos planos y dimensiones que nacen del orixinal retratáu y de la figura reflexada nun espeyu que, na mayor parte de los casos, recueye’l pesu del propiu cuerpu. En delles semeyes apaecen tamién neñes, princeses pequeñes del cuentu de nunca acabar, dispuestes a armar la de coyer por un triste arbeyu. Dende un puntu de vista técnicu, na esposición hai fotos feches con cámara analóxica, dixital y hasta de teléfonu móvil.

Na obra d’Ouka Leele que recueye Inédita establezse un diálogu ente’l mundu real y l’imaxináu, con presencia abundante de referencies a cuentos infantiles, mitos clásicos, oxetos fetiche y retos interpretativos. Tamién son perimportantes les referencies y hasta les presencies d’otres obres fundamentales de la historia del arte –especialmente de la pinacoteca d’El Prado–. Ente les referencies atopamos la de la Venus del espeyu – que rescampla na obra titulada El espejo de Venus tiene escamas (1985), d’una guapura ablucante– o’l nacimientu de Venus. Ente les presencies, Ouka fotografía la lliberación d’una Menina que flota delantre del cuadru de Velázquez, o retrata a una cuarta Gracia, que ta desenredando la so melena roxa perllarga delantre de les tres compañeres que pintara Rubens. Y ye que les obres del muséu d’El Prado impresionaron yá de piquiñina a Ouka hasta facela llorar, cuando ella yera una neña a la que se-y daba perbién dibuxar teyes y antenes que se víen dende’l so cuartu na casa de la cai de La Montera onde vivía.

Otra parte importante de la esposición fórmenla retratos d’artistes, músicos, editores, actrices y actores, como Eduardo Úrculo, Miquel Barceló, los Gabinete Caligari, Jacobo Fitz-James Stuart, Chus Lampreave, Blanca Portillo o Juan Luis Galiardo. Xunto a estos personaxes reconocibles apaecen otros retratos de persones anónimes o de círculos más íntimos de la fotógrafa, onde la mirada creativa y poco convencional también ta siempre presente. Tampoco falten los autoretratos, a pesar de definise Ouka Leele como una artista «mui tímida».

Na esposición, que pudo vese nel Centru Niemeyer, n’Avilés, hasta’l 29 de payares, destacaben tres obres en blanco y negro, les titulaes Humildad, El alma de Lisboa y Mirándonos en el espejo del taller divino, onde la maestría d’Ouka Leele arrevienta cualquier paré.