La obra Alas de Musgo, axunta un piñu de rellatos grandes y pequeños onde l’amor pue más que’l miéu. Con una prosa bien resuelta, la escritora Nohelia Alfonso crea un conxuntu de narraciones de temática escura, sangrina y dañina. Les fuercies de mal tomen posesión de los protagonistes que van pelear por ver si va ganar satán o l’amor, el bien o el mal, la víctima o’l verdugu. La xusticia poética ye una solombra a la que nacen unos cuentos ambientaos nunos escenarios y dómina más o menos contemporáneos y con unos personaxes que tienen, en principiu, una vida común y corriente, ensin que la narración repare muncho nos detalles que nun importen.
Los protagonistes hailos de los dos sexos, aunque dase más el casu de la doncella que se ve nun apuru grande. Pero, claro, aunque los cuentos tengan un puntu románticu, les muyeres que salen nellos son valientes y resuelven la papeleta de tu a tu col que sea. En toles narraciones ta presente un puntu de vista femenín. Y eso nun quier dicir que les muyeres salgan siempre bien paraes, porque les madres, aunque seyan guapes, dicen mentires, y os sentíos, aunque seyan cinco, tamién les engañen, y les apariencies…, eses engañen siempre. El ser muyer fuerte y valiente nun quita de ser mortal y namorase y enfotase nel ser queríu, aunque él seya un vampiru de bon corazón.
La obra de Nohelia Alfonso, que llevó’l premiu Asturies Xoven de Narrativa del 2018 y editó Impronta va poco, borra los finsos ente lo que ye verdá y lo soñao, ente’l mundu de los cuerdos y el de los llocos, ente l’universu de los que s’alcuerden de les coses y los que tán escaecíos. El primer cuentu d’esti volume mama de los cuentos de la tradición oral y el llobu ye un protagonista más. Nesti rellatu hai una presencia notable de términos de la llingua castellana garraos de la llingua asturiana y llionesa. Otres narraciones tienen una temática más social, y falen de les llaceries y gafures que nos toca padecer nesta sociedá del sieglu XXI. Nesta tipoloxía temática destaca como ún de los meyores cuentos del llibru’l que se titula «Bullying». Alas de Musgo ye, en resumíes cuentes, una obra qu’enseña bien el valir creativu como narradora resuelta de la so autora y ta dividíu en dos partes grandes, una pa los cuentos más llargos y otra pa los más curtios. D’esta segunda raza tien munchu nivel el rellatu titulau «Acuario».
Nohelia Alfonso Sáez (La Robla, 1986) ye llincenciada en Filoloxía Hispánica pola Universidá de Llión y profesora de llingua castellana y lliteratura n’Asturies. Como escritora, ta metida nel grupu d’autores nuevos #Plataforma, publica nel blog d’ella y en revistes de creación. Tamién participa en xornaes lliteraries o de xuráu en concursos. Nel añu 2017 yá llevara’l premiu Cersa Ateneo Universidad de León de novela curtia cola obra El mercado de almas.
Alas de Musgo
Nohelia Alfonso Sáez
Editorial Impronta
96 páxines
Leave a Reply