HENRIQUE G. FACURIELLA
El vienres 8 de payares, el Teatru Filarmónica d’Uviéu acoyó la representación de la obra Muyeres inesperaes, con testu de Dolfo Camilo Díaz y la interpretación de la compañía Ververemos. Esta función marcaba l’empiezu del III Premiu y Festival «Nel Amaro» de Teatru profesional en llingua asturiana y gallego-asturianu –qu’entama la Conseyería de Cultura, Política Llingüística y Turismu– y que va tener continuación tolos otros vienres del mes de payares, a les 20:00 hores, nel mesmu escenariu.
Planteada cuasi como una comedia de tesis a favor de la lliberación de les muyeres, funcionen meyor les partes nes qu’esta defensa s’espresa en forma de güelpes d’humor que cuando garra un tonu más d’arenga política o sindical. Esti contraste faise mui evidente nel cuadru terceru, onde’l públicu entra mui bien per tola parte del diálogu ente la frutera (Isabel Friera) y Kitty (Lili Martín) –y eso que contién quiciás les confesiones más dures sobre abusos y desprecios– pero siente que lu saquen de repente del suañu cuando entra na acción la psicóloga y la conversación garra tintes más «filosóficos». Tampoco termina’l guión de resolver con aciertu l’enriedu que se plantea nel cuadru segundu –un home qu’engaña, al mesmu tiempu, a cuatro muyeres qu’acaben coincidiendo nel mesmu bar–, resueltu d’una manera un poco atropellada al final d’esi cuadru –llega a dase la paradoxa de qu’una d’elles nun reconoz a la ex del fíu hasta qu’ésta nun-y lo diz–.
En xeneral, la función del vienres 8 nel Filarmónica paez que pide más hores d’ensayu p’afitar bien el testu –había momentos que nun taba claro en qué sitiu taba asocediendo l’acción, si en Xixón o n’Uviéu– y pa facer más áxiles los cambios ente cuadru y cuadru –les intervenciones de Dolfo Camilo como voz n’off nestos momentos, en cuenta de convidar al públicu a la reflexón, dame la sensación de que valíen más pa sacalu de lo que se taba celebrando nel escenariu–. Too ello facía que los personaxes –sacante los qu’interpretaben Friera, Martín y, en menor midida, Bea Canteli– resultaren poco llograos y qu’a les actrices costara un migayu creyeles nel papel qu’interpretaben.
Esta falta de preparación afectaba tamién a la estaya llingüística de la obra, con fallos y errores de concordancia que, tamos seguros, nun taben nel testu orixinal de Dolfo Camilo Díaz. Depués de dos años enriba de les tables –la obra estrenóse n’avientu del 2017–, quiciás ye’l momentu de da-y una vuelta al montaxe y facer los axustes necesarios –tanto de guión como de producción– pa facer más redonda una obra con bien de puntos fuertes –l’humor frescu y plenamente asturianu de Dolfo Camilo o la valentía a la hora de poner enriba de la mesa temes como la traición, la mentira y l’abusu– pero que tien tovía munches partes que meyorar pa que les y los espectadores lleguen a sentir un rispiu de catarsis.
Muyeres inesperaes
Ververemos
Teatru Filarmónica, Uviéu
8 de payares del 2019
Actrices: Nieves Fernández, Isabel Friera, Lili Martín, Bea Canteli, Sheila Montes y María López.
Música orixinal y canciones: Dolfo Camilo Díaz.
Voz contestador psicóloga: María del Mar López Barrio.
Técnicu: Rubén Álvarez.
Diseñu gráficu: Mara Santurio.
Illuminación: Carlos Dávila.
Escenografía: Luis Ford y ‘Dale Color’.
Leave a Reply