Acaba d’echar a andar la web musicasturiana.com, una tienda on-line onde se pueden atopar más de cien referencies de música n’asturianu de cualquier xéneru y de la mayoría de les cases discográfiques del país. Amás, cuenta con un catálogu dixital onde, anguaño, puen mercase más de 40 referencies pa descargar directamente nel ordenador o nel reproductor d’audio.
Detrás de la idea ta’l periodista especializáu en música Xicu Ariza, que pasó dos años madurándola hasta abrir la tienda al públicu hai mui pocos díes. La so esperiencia llaboral na discográfica Rock Estatal Records fíxolu decatase de qu’había movimientos nel terrén de la distribución musical de los que la música que se producía n’Asturies –y, mayormente, la que s’espresa n’asturianu– nun taba participando pero de los que nun podía quedar descolgada si quería seguir teniendo un mercáu.
Ye sabío pa cualquiera qu’intentara mercar –y, más tovía, vender– música asturiana nos últimos años lo cuesto que se facía esta xera al zarrar la mayoría de les tiendes de discos del país. Y, si esto yera difícil dientro d’Asturies, el llabor volvíase cásique imposible si’l que lo intentaba facer taba fuera. Y too ello nun momentu que les mercancíes nun tienen fronteres y cualquiera pue mercar un productu que se fabrica na otra parte del mundu al traviés d’internet.
Foi al xuntar la necesidá d’un puntu de venta de música asturiana coles oportunidaes qu’ufre’l mercáu on-line como nació musicasturiana.com, una tienda onde xente de tol mundu puede comprar la música que se fai n’Asturies y recibilo en casa en formatu físicu –CD o vinilu– o dixital. Precisamente, la distribución en formatu dixital yera una de les pates que más acoxaben nel mercáu discográficu asturianu, con mui poca presencia de la música del país nes plataformes dixitales más importantes –como iTunes, Google Play o Amazon Music–, ello por nun falar de los servicios de música en streaming –Spotify, Deaser, Youtube…–, que ye una de les formes más populares de sentir música anguaño, sobre manera ente la xente más mozo.
Asina, dientro de los servicios qu’ufre musicasturiana.com a les discográfiques nun ta solo la venta y unviu de los discos físicos a los clientes o la xestión del catálogu dixital nes plataformes de venta on-line principales, sinón que ye una plataforma de distribución activa nos servicios de música en streaming. Ello consíguelo al traviés de la creación de playlists propies y va facer por que los temes del fondu dixital que xestiona tean en llistes con munchos siguidores, lo que va suponer tanto un conocimientu mayor de la música que se fai n’Asturies pela parte del públicu como un aumentu nos beneficios de les discográfiques.
Leave a Reply