HENRIQUE G. FACURIELLA
Hai temes y hai artistes que son como una quemadura; que’l lleer o’l contemplar les obres que producen fai qu’empiece a arder un fueu fríu na base del estómagu y xuba, amenazando con quitanos l’aliendu, esófagu arriba, hasta quemar el gargüelu. Y, entós, queda ún ensin fala. Esto pasa con Miguel Rual (Uviéu, 1992), sobre’l que llevo intentando escribir hai más d’un añu ensin llogralo, ensin topar la voz pa describir el sentimientu que producen los sos dibuxos, los sos retratos, los sos versos… pero, sobre manera, los dibuxos. Una sensación más fuerte que’l deséu de contar, como una mano que m’apretara la tráquea, impedíalo.
Y, de secute, de la que-y daba vueltes al so blog datos biográficos, topé una cita del poeta nuevayorquín Richard Siken: «When you have nothing to say, / Set something on fire. (Cuando nun tengas nada que dicir, / Da-y fueu a dalgo.» Esa foi la mano qu’abrió’l tiru, dos versos qu’atizaron el fueu de la base del estómagu, quemando a llaparaes el pechu y los pulmones. Y, en quemando, pudi respirar. Y alcordéme, entós, del llibru d’Al Berto Horto de incêndio (Güertu de quema) –publicáu’l mesmu añu de la muerte del poeta, 1997– onde se lleen versos como éstos: «os cegos / são o corpo de um fogo lento — uma sarça / que se acende subitamente por dentro (los ciegos / son el cuerpu d’un fueu lentu – una zarza / qu’enciende de sópitu per dientro)».
Los dibuxos de Rual recuerden a Genet, recuerden a Cocteau, recuerden a Mixima. A Cocteau muncho, sobre too nel trazu del dibuxu, na falta de vergoña al representar el sexu y na actitú del personaxe, del que nun se sabe si pasa de nosotros o se nos ta enseñando –fácilmente les dos coses–. De Genet son munchos de los ambientes que podemos figurar alredor de los retratos, ambientes onde too ta permitío, más p’allá de cualquier llende moral –son, por eso, xente ensin pecáu, porque, ensin llei, nun puede haber delitu–. Y ye imposible nun s’alcordar de Mixima al ver les postures que presenten dellos cuerpos y, sobre too, les cuerdes qu’amarren esos cuerpos, el dolor y el gustu que provoquen al rozar la piel hasta oricialo.
Tres de los sos trazos tamién s’alcuentra la influencia –confesión de parte– d’Egon Schiele –patente, ente otres coses, nel dibuxu irregular de los contornos– y del fotógrafu Robert Mapplethorpe –nos músculos enllenos, na sensualidá qu’espeyen les formes de los cuerpos y, otra vez, nel sexu–. La serie de retratos en blancu sobre fondu negru que s’espunxo nel 2016 nel local Lata de Zinc, d’Uviéu, ye, quiciás, onde meyor se reconoz l’espíritu del fotógrafu estaounidense; sicasí, la importancia de la fotografía na obra –y na actitú énte’l mundu– de Miguel Rual va muncho más allá d’un estilu o d’unes formes. Una güeyada a la so cuenta d’Instagram (@insidethepyramid) amuesa bien claro qu’a Rual gústa-y ver y que lu vean. Ensin reparos. Les semeyes que publica (propies o ayenes) espeyen un hedonismu feromónicu, tan densu que non solo se güel, tamién se mazca.
Pero Miguel Rual ye, arriendes d’ello, –y sobre too– poeta. Poemes d’él tán incluíos nes antoloxíes Tenían veinte años y estaban locos (La Bella Varsovia, 2011), La poesía posnoventista española en 15 voces (edición dixital, 2014) y Mecánica Celeste (Círculo Cultural de Valdediós, 2012), pero tamién se puen lleer, mecíos ente dibuxos y fotos, en cualquiera de los sos blogues, formando too ello parte de la mesma obra. Esta intersección ente pallabra y trazu, ente’l testu y el dibuxu, trespasa la pura yustaposición y preséntase, en dellos casos, ocupando’l mesmu espaciu, nun diálogu ente la forma trazada a mano y el testu impresu, que pue ser dende les Confesiones d’una mázcara, de Yukio Mixima, hasta una llei sobre seguridá y productos peligrosos, onde la frase «pólvora negra y sin humo, hasta cinco kilogramos» garra un significáu distintu al pie de la silueta-sombra negra qu’ocupa’l centru de la páxina.
Tolo que llevo dicho espeya un Miguel Rual dionisiacu, por eso llama l’atención, ente tola obra d’él, el dibuxu tituláu Apollon Musagète II –en referencia al dios Apolo como xefe o guía de les Muses–. Nesta obra, alcontramos a un rapaz de gafes repetíu cuatro veces. La so actitú contrasta cola multitú de cuerpos desnudos que pueblen los sitios de Rual n’internet: primero, va vistíu; segundo, tien la so atención puesta en dalgo que ta más p’allá del marcu y non nel espectador. Él mesmu ye un espectador, quiciás del ballet de Stravinski tituláu igual que’l dibuxu y que, na coreografía de George Balanchine, presenta un Apolo mozu y xabaz nuna exaltación de la danza masculina. Un Apolo seique más cercanu al dios Dionisos qu’a sí mesmu.
Leave a Reply