Anque Michael Kenna (Widnes, Lancashire, Inglaterra, 1953) fai trabayos comerciales pa cases tan importantes como la BMW, Audi o Adidas, la mayor parte de la so fotografía tien un componente artísticu altísimu. Siempre en blanco y prieto, lluz y sombra, materia y vaciu –retratando les ciudaes, la industria, pero sobre manera la naturaleza– Kenna enseña la maestría como fotógrafu nesos xuegos de fondos y formes, d’elementos repitíos, de presencies y ausencies del paisaxe que componen unes obres artístiques d’una poesía contenida, sobria y mui intensa.
El fotógrafu, que vive en Seattle, na costa oeste de los Estaos Uníos, tien llevao una montonera premios y ye quién a llegar a lo sublime en trabayos onde la nieve y los árboles faen contrapuntu. Troncos y cañes desnudes, ensin fueyes, ruempen la vista d’un paisaxe uniforme, blancu, puru. Michael Kenna capta esi instante de diálogu ente les formes onde la guapara ye quedase cola esencia de les coses, cola expresión mínima de la llinia, de la mancha, del ser… pa eseñar la plenitú.
El propiu Kenna suel definir les semeyes que fai como haikus visuales. Al marxe de tola tecnoloxía dixital, él escoyó ser un artesanu de la fotografía manual, positivando y revelando película dende va cuarenta años. A la hora de trabayar, ye más de l’alborada que del escurecer, porque paez-y que’l paisaxe ta más calmáu ensin la presencia humana y, amás, porque la lluz del amanecerín ye más suave.
Na obra de Michael Kenna tienen una importancia grandísima tamién les semeyes que se dedicó a facer a lo llargo de más d’una década pelos campos de concentración europeos, enantes de que se convirtieren en museos o centros de visita turística. Toes eses semeyes donóles al Estáu francés como contribución a conservar la memoria del Holocaustu.
Más d’una docena de llibros recueyen parte del trabayu artísticu d’esti artista inglés. Nel sitiu web del fotógrafu puen vese álbumes de semeyes de casi cuarenta países de tolos continentes. Amás, cuasi l’añu enteru fai esposiciones nes ciudaes principales del mundu. Pa Michael Kenna, lo más importante nun fotógrafu ye tener una manera de mirar propia y nun imitar a otros.
Leave a Reply