El 28 de payares, el xuráu de la 39.ª edición del Premiu Xosefa Xovellanos de Novela facía público que la obra ganadora d’anguaño yera El visitante impropiu, del escritor Manuel García Menéndez (Uviéu, 1962). Nesta edición, el xuráu, que falló por unanimidá, formáronlu el director xeneral de Planificación Llingüística y Normalización, Fernando Padilla; la escritora Berta Piñán, ganadora de la edición anterior; los escritores Pablo Texón y Pablo Antón Marín Estrada; el profesor de la Facultá de Filosofía y Lletres Leopoldo Sánchez, y la filóloga del Serviciu de Planificación Llingüística y Normalización Lourdes Álvarez.
En cuantes al argumentu principal d’El visitante impropiu, según cuenta’l so autor, ye la investigación que l’inspector especial Marcos Engrueba lleva a cabu sobre un crime que se produz n’Uviéu nos díes previos a la primavera de 1890. Engrueba, que dirixe un equipu d’inspectores y axentes con base na Calle Mayor de Madrid, ye un altu funcionariu del Cuerpu de Vixilancia, ún de los dos nos que se dividía daquella la policía gubernativa. Per un llau, les implicaciones graves que la prensa y les autoridaes ven nel crime d’Uviéu –de tipu políticu pa dalgunos y hasta con arestes esotériques pa otros– y, per otru llau, la falta de resultaos na investigación, faen que los superiores d’Engrueba lu obliguen a dexar l’acomodu del so despachu en Madrid pa ponese al frente de la policía d’Uviéu col envís de resolver el casu. Dase, amás, la circunstancia de que’l protagonista ye fíu d’unos asturianos de pa la parte Grau, y precisamente hai un episodiu onde se cuenta cómo siendo mui neñu pasa una temporada llarga en pueblu que lu va marcar bastante. Dende’l mesmu momentu que llega a Uviéu como encargáu principal del casu, va viéndose cómo ye la so rellación cola sociedá del llugar, con dellos personaxes que tienen un aquel a les clares mui clarinianu, y colos inspeutores que, a remolera, tienen que se poner baxo’l so mandu. Y cómo en dalgún momentu la marcha de la investigación fai que tamién tenga que dir a esquiñonar pelos arrabaldes de Xixón.
El primer capítulu, de los nueve que tien la novela, trescurre en Madrid, lo mesmo que parte del terceru, y nellos van desenvolviéndose, o zarrándose, otres cuestiones que, más que secundaries, son marxinales con rellación al argumentu principal, pero que valen pa dir descubriendo cómo trabaya la mente de Marcos Engrueba, cómo usa’l so olfatu tanto nun sentíu orgánicu como figuráu, y cómo ye’l so llabor como investigador especializáu n’homicidios. Amás, van descubriéndose otros aspectos de la so personalidá: un home al que-y presta vistir bien y comer meyor, xugador, bebedor, un dandi y, a la vez, un misóxinu: advenedizu y desclasáu, independiente y llacayu, y, a un mesmu tiempu, compasivu y déspota. En cualquier casu, mui rectu nel so oficiu, qu’en parte deprendiera en París y en Londres, polo que n’España ye un pioneru nel usu de les técniques policiales más avanzaes.
Nel segundu capítulu principia’l filu que tien de protagonista a Xulián Prieto, un mozu de maletes de la estación del Norte n’Uviéu, y d’ehí p’alantre van dir alternándose los capítulos de manera que l’argumentu va trescurrir paralelu ente lo que-y va pasando a esti Xulián Prieto y lo que va pasando cola investigación que dirixe Marcos Engrueba. Pero estos capítulos alternos en que ye protagonista Xulián Prieto ocurren con un par de selmanes d’antelación con respecto al desarrollu de la investigación d’Engrueba. Tamién Prieto tien les sos contradicciones: ye trabayador pero quier dexar de selo, ye aldeanu pero les sos mires nun tienen más horizonte que la ciudá, ye revolucionariu pero busca únicamente una salida individual. Ye, en fin, una persona cenciella que guarda secretos revesosos. Entrambos los dos filos argumentativos presten pa dir tratando de pasu un bon númberu de temes: la importancia del ferrocarril a finales del sieglu XIX, los avances del progresu y la visión que tenía d’ellos la xente, la rellación d’Uviéu cola rodiada periurbana, o la sociedá capitalina y los sos espacios y ámbitos de rellación.
Por too ello, pue dicise d’El visitante impropiu que ye una novela policiaca, anque al autor présta-y más dicir que ye «una novela de policía o de detective, un pocu nel sentíu que lo son les histories de Sherlock Holmes, o de Maigret, o les de los detectives d’Agatha Christie». Asina, al respective del policía protagonista de la so historia, diz d’él que ye «un cuarentón garríu, con un bigote como’l que va llucir Hércules Poirot nel so mundu de ficción cuarenta años más tarde», pero tamién de los otros tien un plizcu Engrueba, sobre manera polo que toca a les sos habilidaes deductives, anque toos ellos «son demasiao discretos y miraos pa según ye él», señala García Menéndez. «Engrueba ye “impropiu” en más d’un sentíu», afonda’l so creador. «Pémeque la so manera de ver el mundu y de portase ye más como la de Sherlock Holmes, que vive na mesma dómina, o la de los detectives de Dashiel Hammet, pero pue qu’entá más como la de Marlowe. Tolo qu’ún llee va dexando posu, pero pienso qu’estos clásicos del xéneru, que lleí muncho pero hai bien tiempu, inflúin más n’El visitante impropiu qu’otres obres que lleí de más recién, fundamentalmente d’autores escandinavos como Henning Mankell o Camilla Läckberg, que quiciabes influyeren más en dalguna otra cosuca qu’escribí», reflexona.
L’estilu de Manuel García Menéndez ye, según el mesmu reconoz, «abondo descriptivu», dalgo que se nota especialmente nesta novela. Esto ye asina porque-y interesa que’l llector tenga tolos datos d’ambientación posibles y, pa eso, tuvo que se mandar de fontes mui variaes. Por poner un casu, pa documentar la vida cotidiana de la dómina valióse dende informaciones periodístiques que tán nes hemeroteques de Madrid y Asturies o artículos sobre la construcción del Madrid modernu y de la introducción del allumáu eléctricu, hasta catálogos de moda o anuarios de les compañíes privaes que yeren propietaries daquella de los trazaos del ferrocarril. El llibru de Rafael de Labra De Madrid a Oviedo, y la segunda parte de Tigre Juan diéron-y la idea de cómo enfocar los viaxes en tren, mentes que pa documentar los espacios y la vida uvieína d’aquellos años valióse de munches informaciones, dende El libro de Oviedo de Canella y obres de Carmen Ruiz-Tilve y Manolo Avello, o columnes de Gracia Noriega sobre la historia de dellos espacios de la ciudá, hasta noveles como El Maestrante, de Palacio Valdés; Tigre Juan, de Pérez de Ayala, o Nosotros, los Rivero de Dolores Medio. Y, por descontao, La Regenta, de Leopoldo Alas ‘Clarín’.
Nesti sen, asegura García Menéndez que «l’Uviéu d’El visitante impropiu ye l’Uviéu –o la Vetusta– de Clarín, d’eso nun va tener dulda cualquier persona que llea la novela. Esto ye asina porque se desarrolla malapenes un llustru depués de que saliera La Regenta, y por munchos otros aspectos onde se fai homenaxe a la gran novela de Clarín, como nel episodiu llargu del xuegu y posterior conxusta nel Casinu –a too esto, que yá podemos asturianizar con rigor el títulu y empezar a dicir La Rexenta, desque ta acabante salir la traducción que fixo Víctor Suárez», apunta. El parecíu ente entrambes les dos ciudaes lliteraries ye talu qu’una persona que yá lleó la novela comentó-y que «solo faltaba que peles cais del Uviéu que se cuenta n’El visitante impropiu pasie la Rexenta, solo que será l’Ana Ozores refugada, la que pocos años atrás creyera notar nos llabios el vientre d’un sapu». Con too, l’Uviéu que se retrata na novela de García Menéndez ye una ciudá «socialmente muncho más variada que la que nos dexa ver Clarín al traviés de les clases acomodaes y los sos criaos», tercia l’autor.
En cuantes a la descripción de la ciudá, Tigre Juan ye tamién una referencia importante. Amás, «na novela de Pérez d’Ayala hai un personaxe, Nachín de Nacha, que vive n’El Campillín, no que yera daquella la redolada d’Uviéu. Esti home llevóme a pensar muncho nesi Uviéu periurbanu, que ye tamién pel que pasia Tigre Juan en cata de los sos remedios. Esi Uviéu, qu’entá taba lloñe de que lu encloyara la ciudá, sácolu tamién n’El visitante impropiu, igual que l’Uviéu industrial y proletariu, medio rural tamién, qu’había nos arrabaldes del oeste y al redor de les fábriques metalúrxiques de la entós zona de Los Estancos», cuenta García Menéndez, al que-y paez que la referencia a Nosotros, los Rivero puede llamar más l’atención, pero esplica qu’hasta na novela de Dolores Medio –que se desenvuelve ente los años venti y trenta del sieglu XX–, foi quién a ver l’Uviéu de La Rexenta. En cuantes a la Lancia d’El Maestrante –que narra una historia qu’asocede cuarenta años primero de los fechos de La Rexenta–, paez-y a García Menéndez que yera yá «la mesma Vetusta de Clarín, anque al meyor más zarrada y más escura. Mas escura tamién pola falta de lluz, circunstancia a la que faigo más d’un chisgu n’El visitante impropiu».
Con estes referencies, nun ye estraño que’l xuráu fuera unánime al escoyer El visitante impropiu como novela ganadora del Xosefa Xovellanos y viera nella «una novela ambiciosa, con un oficiu narrativu grande, que representa una propuesta poco habitual na lliteratura asturiana pol so trabayu d’ambientación minuciosu y brillante, amás de tener una trama construida con muncha maña», según reza nel acta. Esta, amás, ye la segunda novela de Manuel García, que, nel 2013, autoeditara La Sienda del Amigu Feliz, una obra esta na que, quiciás por ser la primera, tien muncho del autor, anque l’argumentu sía tamién «d’época» y con un componente exóticu.
Pero quiciás lo que más llama l’atención de la trayectoria del autor ye que, desque publicara nos años ochenta los cuentos infantiles Corcuspín el Rozcayeiru (1984) y Delina nel vaḷḷe’l Faloupu hasta la publicación de La Sienda del Amigu Feliz, pasaren dos décades y media ensin publicar –y cuasi ensin escribir– nada. Nesti sen, señala García Menéndez que nesos años pasara per una crisis creativa y que fueron delles circunstancies personales les que fixeron que se diera otra vez al llabor d’escribir. «Nesos años tiré per otros proyectos de vida, y el mio tiempu, fuera del trabayu que me da de comer, absorbiéronlu otres ocupaciones qu’alloñaron del mio ánimu’l pruyíu por escribir, anque nunca dexé de tar al tantu de lo que se diba faciendo n’asturianu y qu’ensin dulda foi influyéndome. Dempués los vientos soplaron más favoratibles, y un puñáu d’intereses personales, como la filosofía oriental, la cultura popular, les artes marciales, la historia y munchos otros, afaláronme a escribir La Sienda del Amigu Feliz, d’ehí p’acó fueron saliendo otres cosines, cuentos mayormente, por exemplu’l que gana’l concursu últimu del conceyu de Cangas del Narcea (L’home que caéu nun bardión de lata)».
Paez que García Menéndez garró con ganes esta etapa creativa nueva y, agora mesmo, yá ta trabayando n’otra novela, «tamién policiaca, coles reserves que yá se verán no tocante a esta atribución de xéneru», matiza. Amás, tien en mente una novela xuvenil d’aventures y acabaes dende va tiempu y pendientes de publicar otra novelina curtia y un llibru de cuentos p’adultos.
Leave a Reply