(De)Construcción de la Memoria, d’Ung Vai Meng y Chan Hin Lo (qu’agora tán xuntos nel colectivu YiiMa), nun rexistra la memoria d’un tiempu cronolóxicu y llinial. Nun ye, tampoco, el desfilar d’una memoria construyida a partir de fechos sistematizaos, que permitan revisitar la historia de manera estructurada o científica. Ye, más bien, una manera que los artistes tienen de mirar con llibertá’l pasáu dende la comodidá que-yos da’l presente.
Ung Vai Meng y Chan Hin Lo son una pareya de creadores que, dende’l colectivu YiiMa, asumieron la misión de rescatar lo escaecío, quitando la povisa que’l tiempu, ensin remediu, va posando nos finsos del pasáu. Y fáenlo dientro d’una acción artística y aprovechando los conocimientos que tienen de la historia de la cultura occidental y oriental. Y ye por eso, porque nun se pierda la riqueza que conserva’l pasáu reciente, incluso’l de más p’atrás, polo que’l trabayu d’ellos ye importante.
Estos dos artistes tán pol llabor de contribuyir a enseñar la identidá de Macau a partir de la (Des) Construcción de la Memoria, aceptando que la multiculturalidá ye una riqueza y non una entropía.
La esposiciçon (Des)Construcción de la Memoria ta estructurada en cinco partes independientes pero rellacionaes ente elles. Na primer sala ta «Memoria» y ta formada por delles imaxes de temática sensible, que retraten la realidá social o reconstrúin acontecimientos del pasáu de Macau. Na sala segunda tópase «Ritualismu», que ye un espaciu dedicáu a la memoria fechu de semeyes que tienen toes en común qu’enseñen estructures feches con bambú, que xueguen cola escala de lo representao y que dialoguen con una escultura grande –tamién de bambú– que representa elementos arquitectónicos del Monesteriu de Batalha, en Portugal, amestaos col estilu d’edificar típicu de la China. Esta instalación, que simboliza’l sitiu u se faen los sacrificios, repara na importancia espiritual que’l pueblu da a los ritos y lo pegao que ta’l bambú a la cultura tradicional y a la vida de tolos díes, agora, en Macau. N’otra sala, la del centru, puede vese «Llixera», una instalación na que s’emite un videu grabáu nuna estancia secreta de la ciudá vieya de Macau. So los cantares interpretaos polos Water Singers (un grupu vocal de la antigua colonia portuguesa), los cuerpos ximiélguense nun ambiente que nun tien gravedá, pa representar la relación simbólica difusa qu’hai ente les persones, el tiempu y l’espaciu.
La parte penúltima de la espocición ta centrada na ceremonia y titúlase asina mesmo. Ta fecha con imáxes retrataes nun espaciu que primero tuviera dedicáu a la industria y al comerciu marítimu y qu’agora ta abandonáu y escaecíu. Esta sala escarva na idea del mieu. Los visitantes tienen qu’enfrentase a trabayos tridimensionales que tienen una escala muncho más grande que la normal humana. Aunque estes creaciones nacieren nun primer momento de la poesía, los dos artistes usen la imaxe de los cuerpos d’ellos como manera d’aumentar la intervención humana y el sentimientu escénicu. Pa rematar queda Paraísu que seguramente seya la parte más importante de la esposición. Les obres que se ven nella retraten el mundu orixinal de persones comunes y corrientes y pensáronles con un fin especial: l’interior de caún de los espacios escoyíos ta plagáu de símbolos y coses, la mayor parte corrientes, que s’usen pa satisfacer les necesidaes de tolos díes.
Los trabayos que se presenten nesta esposición seguramente nun casen cola idea que los visitantes tengan de Macau. Con too, en toles escenes retrataes cada elementu y cada detalle ye auténticu. Lo que fai qu’estos trabayos sían más importantes ye que munches de les imáxenes que representen enseñen sitios que yá nun existen o qu’acabaron con ellos pa facer proyectos nuevos. Estos sitios taben enllenos d’historia, con munches alcordances por revelar, qu’agora yá namás se van poder visitar nes semeyes feches. Estos sitios son agora parte de la memoria colectiva. Macau foi colonia portuguesa más de cuatro sieglos, hasta 1999, y tou esi tiempu foi un puntu importante onde s’amestaron la cultura oriental cola occidental. Tamién foi un puertu comercial importantísimu. Agora tien la mayor concentración de casinos del mundu. El trabayu artísticu qu’enseña la esposición tien la razón de ser na contemplación d’un Macau que va dexando d’existir yá. La muestra va poder vese nel Muséu Berardo, en Lisboa, hasta’l 9 de febreru del 2020
Leave a Reply