Espiertes. Mires a ver pela ventana. Otru día de mierda en paraísu. Alcuérdeste. Nun tienes trabayu. Les perres acábense. Nun apaez ná curioso. Como tu dices, pa que lo pongan n’Infoyós o en Lindelín y nun lo dean a un conocíu yá tien que ser malo de narices. Miseria. Estudiar y preparase pa esto. Ayer rompió, rompió non, despegóse la suela d’un zapatu. Anduviesti un bon cachu chócola-chócola hasta llegar a casa. El feis nin se t’ocurre abrilo yá. Pa ponete malu viendo cómo xube’l fascismu y maten otra muyer. Mundu de mierda. Pones la sudadera de superhéroe. Quédate pequeña pero torna fríu. Y foi barata. Menos mal que tán los superhéroes y los comics. Tovía queda dalgún sitiu onde haya xusticia y los malos paguen lo que fain.
Pero, ¿hai superhéroes gordonos y vieyos? ¿Hailos que van al dentista? ¿Van al ximnasiu? ¿Hailos que son como tu? La obra del artista suecu Andreas Englund dedícase a retratar superhéroes faciendo la vida de diario. Ellos convirtiéronse nel filu qu’amarra cuasi tola obra d’él y pudo da-y salida a los pensamientos y idees que quería comunicar gracies al humor, al bon humor. De la que la obra d’él medraba colos años, diba dándo-y vida a un conceptu de superhéroe nuevu. Ún que podamos ser cualquiera. Ún que nos llibere de tener que ser perfectos, ensin edá y con bon tipu. Ún que pelee cola guerra que dan les coses tolos díes, pa salvase él en cuenta salvar al mundu.
Andreas Englund nació en Falun (Suecia) en 1974 y vive pa Estocolmo. Ye famosu por facer retratos y pintures realistes al oleu. Espón les obres en museos europeos, en festivales y tamién viende per internet.
Leave a Reply