Llora mi alma de fantoche, de Diego Medrano, ye una recopilación de diez años de poesía del autor (2009-2019) que, a la vez, forma un dípticu que cai como un argayu («Escucho detrás de las puertas», «Las madrugadas sucias») prendiendo fueu a les páxines. Nun ye poesía de la esperiencia, nin de la conciencia, nin del silenciu, nin de nenguna otra moda contemporánea, y namás relluma y salta nella ciertu cosmorama simbolista plenu, tamién fugáu, polo común n’endecasílabu ensin rimar, onde’l suxetu vive ensin dir pel riegu nin col rebañu. Desclasáu, marxinal, separáu, dandy, fatu… de frente a esa realidá plástica, con cuerpu, física, onde llega a embobar y resucitar ensin más nin más por culpa del nacer cimblante y radical de les palabres. Son los años universitarios del autor, azotáu a les casi a lo xole y abrazafaroles escénicu, díes manteníos en suspensu y secretu, agora rescataos de secute, una vez que se llegó a tola reconciliación y paz imprescindibles pa un trámite talu. Diego Medrano, a salváu d’él, puede por fin contalo too sobre aquel tiempu chigreru y inflamable onde suaños y rellumos de los espeyos yeren el puntu de mira meyor p’acertar el futuru y pa poner les normes. Confesión, confusión, flash marcianu, lluz vivo, semeya quieta y señaldá nenguna nel afán llenu de rixu de los díes.
Diego Medrano (Uviéu, 1978) tien publicaes noveles (El clítoris de Camille, Una puta albina colgada del brazo de Francisco Umbral, Tapa el sol con el pulgar), rellatos (La soledad no tiene edad, Los sueños diurnos, Sobrevivir puede ser muy divertido, Dejemos el pesimismo para tiempos mejores), poesía (A veces cuerdo, El hombre entre las rocas, El viento muerde, Agua me falta) y dellos mestos llilterarios caracterizaos pola heterodoxia (Diario del artista echado a perder, Historia golfa de las monarquías hispánicas: guía regia de descarriados, Llévate el paraguas por si llueve: la soledad habitada en Madrid). La correspondencia completa d’él con Leopoldo María Panero vio la lluz nel volume Los héroes inútiles. Tien inédites cuatro obres de teatru, dalguna pendiente de representase.
Llora mi alma de fantoche. Poesía 2009-2019
Diego Medrano
Colección Luna de Abajo Poesía, n.º 12
160 páxines
Leave a Reply