Los que tán bien enteraos de lo que se cuez en Facebook sabrán que cuantayá qu’a los amos de la rede social más poderosa del mundu, la que más sabe de nós y la que más factura de publicidá, siempre-yos dió por enllenar les parés de les oficines con arte. A lo primero, cuando taben na cai Emerson en Palo Alto, en California, foi’l pintor David Choe l’encargáu de los murales. Nos años siguientes, munchos más artistes intervinieron peles parés de les oficines que la empresa tien pel mundu enteru y, nel 2012, la compañía yá fixo un programa duraderu pa dar residencies a creadores que pasó a llamase FB Air. Peles sés de Nueva York, Sao Paulo, Dublín, Johannesburgo y Singapur fixiéronse más de 225 proyectos d’escala grande y acostafecha pa les oficines. La empresa tien especialistes buscando fichaxes y suel encargar les obres a artistes del país ú tan les sucursales pa cada continente.
L’artista visual Paul Bokslag ye’l que firma los murales nuevos de les oficines de Facebook en Dublín. Esti holandés que lleva años viviendo pa Irlanda ye tamién escultor (trabaya muncho con papel recortao y con cuerdes y filo), diseñador y tipógrafu. Les composiciones pal mural recién acabáu tan compuestes de formes xeométriques (triángulos y redondeles) pintaes con retícules de colores vivos –mandando l’azul de la marca de Zuckerberg– que monten unes per otres. Rayes y rayes que nun se sabe si van valir pa que los trabayadores esparzan o pa qu’allorien. Ye de suponer que tendrán un sitiu onde poner si-yos presta, -yos fai gracia, -yos da pena o -yos enciende la idea, nel comité d’empresa o nel feis.
Leave a Reply