Entamáu pola Asociación Cultural Esbardu, y dientro del programa del XXII Festival Intercélticu d’Avilés, esti sábadu 28 de xunetu van tocar a les once de la nueche los Llan de Cubel y los Dallahan no que va ser un conciertu de los que poques veces se ven. L’escenariu va tar nel recintu de la esposición.
Dallahan ye una de les bandes del panorama folk internacional más potentes y fai música inspirada na tradición irlandesa con influencies mui diferentes. Ellos tiren del patrimoniu musical irlandés, escocés y húngaru pa crear unes composiciones úniques y bien amestaes, trazaes con influencies del jazz, el funk, el pop y la música clásica.
Dallahan enbúrriate nun viaxe musical dende les canciones suavines y delicaes de Transilvania hasta les dances irlandeses, tremendes y agotadores, mecíes con ritmos funk. El quintentu fórmenlu Jani Lang (violín y voz), Andrew Waite (acordión), Jack Badcock (guitarra y voz), Ciarán Ryan (banjo, mandolina y violín) y Bev Morris (contrabaxu).
De siguío de sacar, nel 2014, el primer discu –When The Day Is On The Turn–, tuvieron munchísimes allabancies del públicu y de los críticos. La revista fRoots dixo d’ellos que facíen «la música irlandesa más escitante que s’oyere en tiempu» y definíalos como «los Lunasa d’una xeneración nueva». Dallahan, dende aquella, lleva dando conciertos per toa Europa y América del Norte en festivales de postín, y faciendo unos espectáculos en directu ablucantes.
Nel añu 2016, vieron cómo la fama d’ellos medraba al publicar el so segundu discu, Matter Of Time. Con él fixeron un a xira mundial, llegando a tocar más d’un cientu conciertos en siete continentes. Esti trabayu ameritó la distinción de Discu del Añu pa los Premios de la Música Tradicional Escocesa y tamién el premiu a la Pieza instrumental del Añu de los premios Live Ireland.
En cuantes a Llan de Cubel, ye’l grupu decanu y de referencia de la música folk asturiana. Trabayen cola tradición músical del país, dándo-y un soníu nuevu. Tiren de material recoyío nos archivos de los grupos asturianos d’investigación etnográfica y de los cancioneros tradicionales, y completen les fontes cola recuperación polos miembros del grupu de temes tradicionales directamente de la xente asturiano, ensin escaecer los temes más populares del país.
La formación musical de los componentes del grupu básase en dos partes fundamentales: per un llau, son músicos tradicionales –conocedores y intérpretes habituales de los instrumentos más característicos d’Asturies–, per otru llau, el so interés por otres tradiciones de la Europa atlántica enriquecieron los conocimientos musicales del grupu –especialmente nos aspectos técnicos y harmónicos–.
El soníu de Llan de Cubel ye acústicu. El pesu de la melodía y la percusión llévenlu los instrumentos tradicionales asturianos (gaita, violín, flauta travesera de madera, tambor y panderos), mentes que l’harmonía apúrrenla la guitarra acústica y el bouzouki (que tamién contribúin a la base rítmica sólida tan característica del grupu). Namás recurren a instrumentos eléctricos (pedalera de baxos y teclaos) como sofitu en pasaxes mui concretos de dellos temes. Anque la llinia de les creaciones d’ellos ye básicamente instrumental, el grupu tamién trabaya l’aspectu vocal aprovechando la tradición llarga y rica nesta fastera de la música tradicional astur.
El repertoriu del grupu vien, en gran midida, de la tradición asturiana de violín, flauta, acurdión y, sobre too, de gaita: alboraes, marches y pasucáis, bailles (como saltones, muñeres, polques…), música relixosa (misa de gaita, entemediu misa), etc. Otres fontes habituales inclúin dances y canción tradicional asturiana: tonada, vaqueiradas, villancicos, cantares (de la marina, de trabayu, de chigre…). En cuantes a los temes cantaos, anque tien nel repertoriu delles lletres tradicionales, Llan de Cubel aveza a usar testos d’autores contemporáneos, siempre musicaos con melodíes tradicionales asturianes.
Dende que nacieron como grupu, nel 1984, Llan de Cubel participó de manera fundamental nel procesu revitalización de la cultura tradicional asturiana, contribuyendo en forma a la so divulgación, sobre too no tocante a la música y la llingua. El so llabor como grupu pioneru del folk asturianu ta reconocíu na importante obra Hestoria d’Asturies, nel apartáu dedicáu a la hestoria de la música asturiana. Anguaño ye la formación más consolidada dientro del movimientu folk del país y una referencia importante pa les xeneraciones nueves de músicos.
Leave a Reply