Blue Motel ye’l nome del trabayu discográficu nuevu de Bart & The Bedazzled, el plan musical nel que anda agora Bart Davenport. Con un aire cinematográficu, y cola ciudá de Los Ánxeles de fondu, el soníu d’esta banda ye’l rock con pingarates de jangly pop: toques de guitarra y coros entecortaos, caxa redoblante, saxofón, baxu y lletres onde se sorayen les histories nes que se fala de los trabayos de tolos díis, les quedaes y les rellaciones amoroses, les males raches de perres, la inocencia que voló y el tiempu qu’escapa. Un discu con un aquel señaldosu que mama de la música inglesa elegante de finales de los setenta y primeros de los ochenta.
Bart & The Bedazzled van presentar esti discu (que fai’l sétimu dende que Davenport empezara na música nel 2002) na sala La Salvaje, d’Uviéu, el día 2 d’avientu a les nueve y media, de nueche.
Bart & The Bedazzled
La Salvaje, Uviéu
2 d’avientu, 21:30 h.
Leave a Reply