‘Lluz d’agostu’: Xixón pel cristal de Nacho Vegas

El sábadu 18 de payares, a les diez y cuartu de la nueche, nel CMI Pumarín – Xixón Sur, dientro de la sección «Esbilla» del Festival Internacional de Cine de Xixón, va estrenase’l documental Lluz d’agostu en Xixón, ópera prima del uviedín Alejandro Nafría. Nesta cinta de cien minutos, el director sigue los pasos del cantante y compositor Nacho Vegas y filma los alcuentros d’esti con personaxes de la vida política y cultural de Xixón, lo que resulta nun retratu plural y, en dellos casos, estremáu de la propia ciudá.

La película rodóse a tres díes del conciertu qu’entamara’l propiu Nacho Vegas con motivu del quintu aniversariu de la Plataforma d’Afectaos pola Hipoteca (PAHD) d’Asturies, un fechu que valió al cantante y, con él, al director, pa reflexonar sobre les tresformaciones que sufrió la ciudá nes últimes décades. Esta reflexón, amás, nun se fai en forma de monólogu, sinón de diálogu ente Vegas y persones como Mar Álvarez (Petit Pop, Pauline en la Playa), la periodista y poeta Alicia Álvarez, l’escritor Xandru Fernández, Xabel Vegas (Manta Ray), Isabel Muñiz (dueña del bar La vida alegre), el cantautor Toli Morilla, el cineasta y escritor Ramón Lluís Bande, el sociólogu César Rendueles, la poeta y diputada de Podemos Sofía Castañón, el músicu Pablo Und Destruktion, l’escritor Jorge Alonso, el pintor y illustrador Adolfo P. Suárez, el músicu Iker González, la cantautora Fee Reega, el músicu Luis Rodríguez o’l tamién músicu Nacho Álvarez. Pero esti diálogu que tien a Xixón como centru y a Vegas como filu conductor nun queda nos individuos, sinón que s’estiende a colectivos que desenvuelven, anguaño, un papel al mesmu tiempu críticu y dinamizador de la vida social y cultural de la ciudá, como’l Coru Internacional Antifascista Matriarcal Al Altu La Lleva, el colectivu Fame Poétika (con voces como les de Nacho Wings, Diego Solís o Cristina García) o la propia Plataforma d’Afectaos pola Hipoteca.

Toes estes voces creen, ente sí, una rellación que’l director, Alejandro Nafría, califica de «simbiótica», pos, como na simbiosis biolóxica, nesti sistema, los organismos que participen nél espolleten, evolucionen, faense al mediu y hasta lu tresformen. Esti mediu ye la ciudá de Xixón, que, como otres ciudaes europees de tradición industrial, preséntase güei como un ente indefiníu que dulda ente dellos modelos estremaos de desenvolvimientu. Ente estos modelos alcuéntrase’l de la burbuya inmobiliaria, que, al españar, llevó consigo a munches persones que se vieron na cai o amenazaes con ello por nun poder pagar la hipoteca. Pero les crisis y tresformaciones peles que pasó la ciudá dende les primeres reconversiones industriales (minería, siderurxa, naval…) hasta’l bastiazu económicu actual supunxeron una oportunidá pa que se desenvolviera un ecosistema cultural del que tanto Vegas como los individuos y colectivos que pasen per Lluz d’agostu en Xixón son exemplares granibles y destacaos.

Alejandro Nafría (Uviéu, Asturies, 1974) ye fotógrafu d’oficiu, un campu onde trabayó n’estayes estremaes, anque’l tarrén favoritu d’él foi siempre’l fotoperiodismu. Collaborador de los diarios Le Monde y Asturies24 y la revista Neville, pasó dos años siguiendo, un día tres d’otru, ún de los últimos conflictos industriales en Xixón, el de la fábrica La Monroe. Apasionáu pola fotografía de los xestos que definen y tracen les personalidaes de la xente corriente, tien colgaes un puñáu d’esposiciones y trés llibros editaos: La Hierba más verde (A buen Paso), Gente de Nod (KRK) y La rebelión empieza leyendo (Ediciones Bajamar).

En cuantes al documental Lluz d’agostu en Xixón. Tres los pasos de Nacho Vegas, Nafría comenta que, cuando Nacho Vegas aceptó facer la película, nun-y pidió más qu’una cosa: «que nun quería sentase trés hores delantre d’una cámara a falar de sí mesmu», dalgo qu’al director prestó-y sentir porque yera xusto eso lo que buscaba. Pa la realización y producción del documental, Nafría contó cola collaboración, ente otres persones, de Pablo A. Quiroga Prendes (Algamar Producciones) como ayudante de dirección y Juan Tizón (Señor Paraguas) como director de fotografía y responsable del montaxe. Nel guión tabayaron mano a mano Juan Tizón y Jorge Alonso, redactor del programa La radio es mía (RPA), coautor de la saga El Antiguo Egipto en del cine, La Antigua Grecia en el cine, La Antigua Roma en el cine y La Edad Media en el cine (T&B Editores) y autor de Compartiendo las semillas. Nick Cave & The Bad Seeds (66Rpm).

Lluz d’agostu en Xixón. Tres los pasos de Nacho Vegas
Dirección: Alejandro Nafría
Guión: Jorge Alonso, Juan Tizón
Ayte. Dirección: Pablo A. Quiroga Prendes
Dirección de fotografía: Juan Tizón
Soníu: Anibal Menchaca
Montaxe: Juan Tizón
Ayte. Producción: Ana Iglesias
Música: Anibal Menchaca, Nacho Vegas
Dirección d’arte: Aida Trabanco
Maquillaxe y peluquería: Andrea G. Trabanco
Op. Cámara: Miguel Suárez
Foto fixa, redes: Óscar D. Rodríguez
Producción asociada: Inés Romeo, Alfonso S. Suárez

Deja un comentario