La materia de reflexón y estudiu nesti llibru constitúila la teoría y la práctica del poder nel terrenu que, dende’l tronu d’Uviéu primero y de Llión depués, mandaron, entre’l sieglu VIII y el sieglu XII, los monarques que reclamaron pa ellos ser reis d’Hispania. Importa, lo primero, la historia social del poder o, dicho d’otra manera, ponse l’atención nel poder políticu, por ser elementu integrante vital de la construcción de les relaciones sociales.
Con raigaños bien llargos, que se funden hasta na tradición bíblica, mamen de la respublica romana y, de frente, deriven de la monarquía católica toledana, l’árbol de la ideoloxía del poder nel espaciu y el tiempu al se refier l’estudiu tien na figura del rex Dei gratia (rei pola gracia de Dios) el troncu que lu sostién. La parte primera del llibru atiende, p’analizala, pa la teoría política, mayormente espresada nel ser sagrada la figura de los reis, dalgo que nun ye poca cosa o namás un adornu nel estudiu de les relaciones de poder. L’aceptalo y l’enraigonar na mentalidá colectiva llevántase como un pegollu fundamental de la construcción política, na medida na qu’intervién de manera decisiva na llexitimación de los monarques. Nunos tiempos nos que la práctica política pon ensin parar en cuestión el poder d’éstos, la garantía de llexitimidá ye, munches veces, la única agarradera de la continuidá.
Al estudiu de les práctiques polítiques dedíquense les partes segunda y tercera del llibru. L’usu del plural quier espresar la diversidá d’eses práctiques nel tiempu y nel espaciu. L’escoyer les fasteres oriental y occidental del reinu como escenariu del exerciciu del poder respuende al interés de remarcar la diversidá, d’amosar, a partir d’un fondu estructural común, les modulaciones y los detalles. Pal oriente del reinu, Castiella entiéndese que ye un espaciu de frontera. Non cola condición, compartida con tol cantu meridional del reinu, de frontera col dominiu de los musulmanes, sinon na d’área de contactu colos otros poderes cristianos, sobre manera col reinu de Navarra, nacíu más pal este. Na fastera occidental, la continuidá d’una tradición antigua mui asentada que, dende’l puntu de vista de la individuación política, yá se remonta a la división provincial romana, sigue col reinu los suevos y mantiénse na dómina de los visigodos, ye la base pa la esplicación de la historia medieval alta de Gallaecia, examinada dende’l puntu de vista de los poderes enraigonaos nel territoriu.
Javier Fernández Conde ye caderalgu d’Historia Medieval de la Universidá d’Uviéu dende 1990. Nes investigaciones d’él ocupóse de la historia social y relixosa na Edá Media. Nesti llibru analiza la construcción teórica y ideolóxica del poder nos reinos d’Asturies y Llión-Castiella, atendiendo, preferentemente, a les formulaciones documentales.
José M.ª Mínguez ye caderalgu d’Historia Medieval de la Universidá de Salamanca dende l’añu 1983. Ensin renunciar a la investigación d’otros períodos y otres sociedaes, l’interés prioritariu d’él ta nel estudiu de les munches interrellaciones ente les estructures económiques, sociales y polítiques nel reinu astur-llionés nos sieglos VIII al XII.
Ermelindo Portela ye caderalgu d’Historia Medieval de la Universidá de Santiago de Compostela dende 1982. Anguaño ye profesor eméritu d’esa universidá. Les investigaciones d’él centráronse lo que más na historia social y política de los sieglos VIII al XII nel ámbitu del reinu llionés.
El reino de Hispania (siglos VIII-XII)
Javier Fernández Conde, José María Mínguez y Ermelindo Portela
Akal, 2019
432 páxines
Leave a Reply