El Silencio de Otros ye una película sobre la llucha callada de les víctimes del réxime franquista, que siguen buscando que se faiga xusticia tovía agora. Grabada en seis años, esta historia producióla Pedro Almódovar y tien de directores a Almudena Carracedo y Robert Bahar. Con estilu mui directu y íntimu, la película a compaña a les víctimes y a los supervivientes de la dictadura de Franco a midida que van entamando la que se conoz como «Querella Arxentina» y que resulta un pactu «contra l’olvidu» sobre los crímenes que pasaron.
El Silencio de Otros llevó’l premiu del públicu y el de la Paz na última Berlinale na categoría de documental. A partir d’esti vienres 23 va poder vese nos cines Yelmo n’Uviéu. La película va aguantar na cartelera en función del éxitu que tenga, porque la competencia coles grandes productores de cine comercial ye complicada pa un cinta documental. Amás, el día 30 de payares, en Xixón, na Cinemateca de la Llaboral, ta previstu un coloquiu colos directores y con dalgún de los protagonistes.
Una película imprescindible pa nun escaecer, p’apoyar a les familes que tienen enterraos en cunetes y en fueses a los d’ellos. Pa que conozan la historia d’España los que nun la conocen y pa facer xusticia, una xusticia que la Llei d’Amnistía de 1977 negó a les víctimes del franquismu.
Leave a Reply