La publicidá llega a toles partes. Los encontos cambiaron pero la publicidá sigue y mueve munches perres y les perres mueven voluntaes. Yá nun queda onde poner un anunciu, una marca (encubierta o non), un desempaquetáu, una persona influyente que fala maraviyes. Hai munchos años, nesa cosa tan antigua que llamamos televisón, el deterxente recomendábatelo una vecina. Agora ye una influyente. Paez que tenemos más enfotu no que nos dicen persones que nun faen un anunciu clásicu pero qu’anuncia coses por perres, non porque valgan.
En Polonia, aunque la xente nun lo note muncho, ta convirtiéndose en vezu que les marques comerciales usen un videuclip d’un grupu de música p’anunciase. Y la fórmula ta furrulándo-yos que se mata. Talu ye’l casu de la marca Durex y el grupu The Dumplings. Esta banda d’electropop son un dúu: Justyna Święs y Kuba Karaś. Hasta la fecha, tienen publicaos tres discos. El veranu pasáu nun teníen ná en mente y propunxéron-yos facer un cantar –frescu y prestosu, como tolos d’ellos– y un videu pa promocionalu. Un cantar sobre l’amor, pero un amor con muncha acción y poques palabres, que se titula mesmamente «Bez Słów (Ensin palabres)» y que, según les persones qu’usen la plataforma Youtube en Polonia, foi la causa del calor tan grandísimu, que nun ye normal pal país, que pasaron esti branu.
Bez Słów fala d’un amor igualitariu, ensin distinción de preferencies sexuales, de persones que quieren cariciase, sentise, besase na boca. Un amor sensual y sexual.
Leave a Reply