ALBERTO SUÁREZ
Hai munchu saber facer les coses, muncha intelixencia y muncha esperiencia detrás de les lletres y la música de León Benavente. Cervantes escribió El Quixote con cincuenta años. Primero d’esa edá tamién se puen dicir munches coses, pero’l posu y el pasu del tiempu ye lo que da la midida. Con cincuenta y un poco cabecina, si se quier, ye cuando la persona llega a la seguridá de que cuasi too ye inútil, pero que nos apetez facelo por sentir que tamos vivos. Y, entós, les coses que se cuenten y viven vense con otra dimensión. Nun hai que consiguir nada material. Ye’l puru gustu de facelo.
León Benavente fala nes canciones d’ellos de lo que ye salise del caminín que nos marquen otros (estudia, pelea, trabaya, trunfa, revienta). D’esi tirar de la manta y carretera. Tamién espresen mui bien esi impulsu de salir a los bares hores y hores, nueches y nueches, daqué tan inútil como necesario en dalgunes etapes de la vida. Nun hai cosa peor que un grupu música ensin personalidá. La manera de cantar/recitar/narrar acompañada d’esi rock kraut, sicodélicu y electrónicu, y d’una calidá instrumental escelente y elegante, conviérten a León Benavente nun placer intelixente y diferente (cuasi una escepción) del panorama musical d’España.
León y Benavente son les dos poblaciones grandes, los dos fitos, que marquen el camín pa Madrid dende Asturies. Ye una pena que, como país, nun fuéremos capaces de tener futuru. Xente nuevo y preparao emigra y cada vez tenemos menos potencia. Ta bien salir fuera por gustu pero non por necesidá. Eso ye un fracasu. Asturies ye un país fracasáu, y los asturianos que tan pel mundu son la midida d’esi fracasu, porque, si pudieren volver, volvíen, y diben llenar de vida, d’alegría y d’oportunidaes la tierra d’ellos. El fracasu retrátalu mui bien León Benavente nes canciones d’ellos.
Leave a Reply