Maite Centol (Logroño, 1963) considera que l’exerciciu de la pintura, como sinónimu de resistencia, na intensificación de l’acción propia, nun pue enseñase neutral; pintar ye ser y tamién tar. Esti ye l’arranque del fechu físicu de pintar, entamar una rozadura emocional na mestura de la esperiencia col significáu. El resultáu ye una llectura personal d’información sobre cantidaes que pue vese como esposición temporal nel Muséu de Belles Artes d’Asturies.
La muestra, que se titula Nada, poco, bastante, muncho…, ye un proyectu particular que se sostién nel dibuxu entendíu como representación de cifres y númberos. Amás, ye un actu que cai una vez y otra vez na abstracción col aquel de reflexar nel muséu idees, de la que s’apodera d’un llinguaxe visual que convierte en formes (propies de la señalética o de les gráfiques y diagrames que suelen usase pa dar a concocer datos) y que nun dexen de ser composiciones constructives que se basen en repeticiones iróniques d’elementos simples.
Los datos inspiradores lleguen a l’artista cola llectura d’estudios qu’analicen opiniones y paeceres del públicu que visitó’l Muséu de Belles Artes nos años 2014 y 2019. Les obres nacen como representaciones en forma de diagrames y esquemes que son supuestos contenedores de la información d’eses encuestes codificada y simplificada y qu’acaben resultando derivaciones xeométriques que nacen llibres, ensin reflexar los propios datos. Les obres (la mayoría dibuxos y pintures de formatu grande, pero tamién instalaciones y escultures en madera) nacen pa cuestionar l’interés qu’hai nestos tiempos por querer contar en cifres coses que son intanxibles.
Nada, poco, bastante, muncho…
Muséu de Belles Artes d’Asturies
Hasta’l 26 de xineru del 2020
Leave a Reply