La Tertulia Malory, de L’Entregu, escoyó como meyor llibru n’asturianu de tolos que s’editaron nel 2015 el poemariu L’aire ente la rama, de la escritora d’Argüeyes (Siero) Ángeles Carbajal. El xuráu formáronlu los escritores Xulio Arbesú, José Luis Rendueles, Pablo Rodríguez Medina, Solinca Turbón, David Fernán, Roberto Corte, Chechu García y Henrique G. Facuriella, que fallaron el premiu nun actu celebráu na tertulia’l 24 de xunu del 2016.
«L’aciertu col qu’Ángeles Carbajal vuelve la mirada a la infancia y la tresmuta n’imáxenes d’un conteníu llíricu y emocional mui fondu, non solo como memoria del tiempu que pasó, sinón, sobre manera, como diálogu ente’l yo poéticu qu’escribe nel presente y la neña que foi. Rescampla nesti poemariu de Carbajal una habilidá pa rescatar los conocimientos del pasáu y tresformalos en materia válida pa trensitar la vida hacia’l futuru», pue lleese nel acta del fallu.
El gallardón consiste nuna ilustración d’Alfonso Zapico y una medaya conmemorativa, que se van entregar nun actu públicu en L’Entregu en feches prósimes. Esta ye la quinta vez que’l grupu concede esti premiu, l’añu pasáu resultó ganadora Más espeso que l’agua, colección de cuentos de Consuelo Vega, y, n’ediciones anteriores, premiáronse les obres Carne de melandru, de Milio Rodriguez Cueto; La Chelita, de Ruma Barbero, y La ñeve del Cuquiellu, de Xabiero Cayarga.
Con esti gallardón, los sos entamadores quieren prestixar les lletres asturianes, al empar que se da difusión a les obres que, a criteriu del xuráu, sían consideraes los meyores llibros escritos cada añu n’asturianu.
L’aire ente la rama ye un llibru de poemes que nacen nun momentu de bloquéu creativu de la propia autora y onde, como una manera de garrar fuercia y poder avanzar, vuelve la vista al pasáu, a la infancia y los personaxes que la pueblen. Asina, ye natural que nos sos versos asomen les formes y los temes de la poesía elexaca, pero tamién s’atopa esa sabiduría clara de los neños, esa manera d’acertar a ver el sentíu fondu de les coses, de los símbolos, que, llamentablemente, la transición al mundu de los adultos fai que s’escuenda y, en dellos casos, hasta s’olvide.
Nesti sen, son significatives les palabres de Carbajal nuna entrevista concedida a la revista Brixel, onde señala que «los neños saben coses mui importantes, pero tienen tanta fuercia que son quién a vivir con elles ensin mayor problema. Lo que pasa ye que, a midida que vamos medrando, la necesidá de facese adultos oblíganos a meter toes eses coses que sabemos nuna especie de caxón escuru d’onde nun salen más qu’en momentos mui claves de la vida».
Ángeles Carbajal (Argüeyes, Siero, 1959) ye llicenciada n’Historia del Arte pola Universidá d’Uviéu. El so primer llibru n’asturianu foi En campu abiertu, col que ganó’l Premiu Teodoro Cuesta de Poesía nel añu 2012. Sicasí, la so obra poética publicada arranca en 1993 cola edición de La caligrafía de la distancia, al que diba siguir, nel 2002, La sombra de otros días, entrambos los dos en castellanu. L’aire ente la rama foi merecedor tamién del Premiu Xuan María Acebal de poesía del añu 2014. Carbajal ye collaboradora de delles revistes lliteraries, como Reloj de Arena o Clarín, y dirixó munchos de los talleres de llectura y creación lliteraria que promovieron tanto’l Conceyu d’Uviéu como la Obra Social y Cultural de Cajastur.
Leave a Reply