Según los datos que publiquen na revista Asturies Xosé Antón Fernández ‘Ambás’, Ramsés Ilesies y Carlos Suari, sacaos de les investigaciones y trabayos de campu que fixeron, El Boliche ye un xuegu d’adultos namás, en concreto d’homes. Nunes zones xugábase en feches señales y n’otres, de contino. El xuegu ye mui particular pol sitiu onde se xuega –una poza con forma de media esfera d’un metru d’anchor– y porque s’apuesten perres. La manera de xugar ye tirando unes boles de madera más grandes qu’ablanes y más pequeñes que nueces, polo xeneral seis. El tirador tien que ser a meter nun depósitu con forma d’escudiella qu’hai en fondu la poza el númberu de boles, pares o nones, pol qu’apostara. Pero hai munchos otros detalles que compliquen el xuegu.
L’artículu facilita muncha información documentada de les zones d’Asturies –por conceyos– onde se sabe que se xugaba a El Boliche, los tipos de poza distintos, les regles del xuegu, la cantidá de perres que s’apostaben, la consideranza social d’esti divertimentu o la documentación qu’atoparon sobre xuegos paecíos nel mundu. Tamién se documenta y retrata a munchos de los informantes. Una investigación interesantísima pa recuperar un patrimoniu etnográficu, cultural y social desconocíu y un artículu impecable nel fondu, na forma, nel detalle de la documentación y nes semeyes (que firma Ambás).
La revista Asturies, Memoria encesa d’un país, qu’edita la Fundación Belenos, ta acabante poner nes llibreríes el númberu 37. Esta publicación ye un referente pa la divulgación d’investigaciones y estudios sobre’l nuestru país. Fernando Montes, biólogu especialista n’ecoloxía, fala de los reptiles nuna serie de reportaxes qu’empieza coles culiebres más comunes n’Asturies. Miguel Ángel González escribe de Valeriu del Bierzo, un ermitañu del sieglu VII que na autobiografía identifícase como «indíxena de la provincia asturiense».
L’alicorniu y la piedra la culiebra
Alberto Álvarez Peña y Martín de Villar firmen un artículu ú s’enseñen semeyes d’amuletos d’alicornios y piedres de la culiebra, de los qu’hubo munchos antaño. La mayor parte de los qu’enseñen –nunes semeyes perbones onde puen vese con munchu detalle– son de la fastera más occidental, aunque tamién los hai de la zona del centru. Los alicornios valíen, según la tradición popular, pa sanar d’enfermedaes que daben por cuenta d’un mal desconocíu y, entós, pensábase que yera por causa del mal del güeyu d’una bruxa o pola envidia. En cuantes a les piedres de la culiebra, creyíase que curaben les mordedures d’estes gafures. Los rituales d’usu son mui paecíos en sitios diferentes del país, echando l’alicorniu n’agua a puntu ferver y faciendo unos recitaos o oraciones o poniendo la piedra la culiebra enriba la picadura pa que sorbiere’l velenu y llimpiándola depués dexándola a remueyu en lleche. Tamién enseñen nesti artículu piedres de la lleche, que, según les creyencies d’aquel entós, valíen pa que la madre tuviera lleche abondo pa dar de mamar a un fíu. D’esti exemplu últimu de piedra con valor máxicu documenten una piedra’l ḷḷeiti d’Astierna, n’Ibias, que se valoró na partición d’una herencia como l’equivalente a una vaca. Esta información acreita hasta qué puntu yeren valioses pa los nuestros antepasaos.
Na sección que la revista Asturies dedica a la memoria gráfica, publícase un reportaxe sobre la tipoloxía de la casa tradicional nel pueblu somedanu d’El Vaḷḷe. Firmáu por Naciu’i Riguilón y Vítor Lana Brañas, l’artículu describe la dificultá de poblar de manera estable una aldea que ta a más de mil doscientos metros d’altura y qu’aguantaba bien de nevaes y fríos cuasi seis meses al añu. El primer modelu de casa del Vaḷḷe yera cuasi cuadrada, d’una planta y de pocos metros –cocina con llar, un cuartín y una cuadra– y compartíen l’espaciu los vecinos col ganáu. Les construcciones, según se va asentando más población, medren n’altura y pasen pa dos plantes, y medren en llargor y pasen a ser rectangulares o en forma d’ele. D’esta manera, la planta de baxo ye pa cuadra y la plata riba ye pa vivienda y pa payar. Les semeyes antigües qu’ilustren esta sección son espectaculares.
L’ocle ye’l protagonista d’otru artículu que firma José Manuel Artime y, más en concreto, la manera de pañar, carretar y curar esta planta marina nel pueblu d’Antromero, nel conceyu Gozón. L’ocle sácabase de les playes y pedreros nes temporaes d’iviernu y branu cuando lo arranca la mar y valía, nun principiu, pa cuchar les tierres. Paez ser que tien cualidaes pa nutrir y desinfestar la tierra. Col tiempu y los avances de les industries farmacéutiques y d’alimentación, l’ocle yá se recoyía pa vendelo a estes industries. Aunque’l trabayu de sacalo y curalo ensin que se perdiera yera grande, compensaba porque lo pagaben bien, de manera tala qu’esta actividá –según rellata l’autor del artículu– cambió la economía’l pueblu. Anguaño, en palabres d’una vecina informante, Lucía les Moranes «yá nada ye igual, por no haber ya nun hai ni ocle».
Leave a Reply