Na galería Bea Villamarín de Xixón puede vese la obra de Carlos Tárdez (Madrid, 1976), un trabayu enllenu de contrastes. Retratos de formatu grande al oleu representando delles escenes inocentes de neños xugando enséñense al par d’escultures perpequeñines de resina que representen adultos, homes y muyeres, esnudos, que simbolicen referencies picardioses y xuicios de valor (negativos) que tán na sociedá: un cuerpu de muyer en pulgina, con tacones coloraos y cabeza de gamba, o un home como una boroña de gordu con una cerilla apagada nel puñu.
La obra de Tárdez, que ta llicenciáu en Belles Artes pola Universidá Complutense, encara’l mundu de la inocencia y el de la malicia humanes, representaos n’edaes diferentes, dando una importancia taoísta al espaciu vaciu qu’arrodia les creaciones d’él. En palabres de la galerista, «el vaciu y l’espaciu concretu, les miares perdíes y encontraes y la simboloxía histórica o mitolóxica siguen siendo’l filu conductor de la obra de Carlos. Un escenariu onde se desendolca una narrativa enigmática con un toque de teatralidá».
La esposición, que se titula Hazañas Bélicas complétase con delles obres protagonizaes por fauna selvaxe africana, obres coles que l’autor simboliza estaos d’ánimu y conceptos asimilaos colos animales retrataos.
Hazañas Bélicas
Bea Villamarín, Arte y Colección
San Antonio 5, Xixón
Leave a Reply