Los protagonistes de la cinta El Viaxante, d’Asghar Farhadi (1972) son dos actores de teatru, un home y una muyer, que tán representando la obra d’Arthur Miller Muerte d’un viaxante. Esta circunstancia y el pisu nuevu pal que cambien pa vivir son les ferramientes que sirven al director iraninu –que yá lleva ganaos dos Oscar– pa enmarcar la historia. L’acción ponse en plan cuando a Rana, la moza d’esta pareya, la ataquen na casa nueva. Entós ye cuando empieza’l drama, que tien toques de thriller, al vese qu’ella nun ye quién a quitar lo que pasó de la cabeza y al dir dando vueltes el mozu pa ver de qué manera pue vengase d’esta agresión. La obsesión pola venganza apodérase d’él y de la historia, manteniendo un ritmu qu’engancha al espectador darréu.
Las claves del cine de Fahardi son facer un crítica de la situación social del Irán, xugar col suspense, con una intriga qu’afecta a unos pocos personaxes a los que-yos pasa algo malo colo que nun contaben y que tienen que ser quién a enfrentase a ello descubriendo les contradiccones que tienen dientro. Una llucha pola xusticia y por consiguir la calma que, bien de veces, nun val pa nada.
El Viaxante llevó’l premiu Oscar 2017 a la película meyor en llingua que nun fuera inglesa. Tamién llevó’l premiu al guión meyor y al actor meyor nel Festival de Cannes del añu 2016.
El Viaxante
18 de payares. Teatru Filarmónica.
Versión orixinal en persa y n’inglés, con subtítulos en castellanu.
Película que nun se recomienda pa más pequeños de 12 años.
Repartu: Shahab Hosseini, Taraneh, Alidoosti, Babak Karimi, Mina Sadati.
Guión: Asghar Farhadi.
Fotografía: Hossein Jafarian.
Montaxe: Hayedeh Safiyari.
Música: Sattar Oraki.
Producción: Asghar Farhadi, Alexandre Mallet-Guy, Olivier Père.
Dirección: Asghar Farhadi
Irán, Francia / 2016 / Color / 125 min.
Leave a Reply