Dende lo primero de la carrera de Walterio Iraheta, esti artista salvadoreñu centróse en desendolcar llinguaxes, pa espresase, nuevos. Nun ritmu mui cercanu a la poesía visual y conceptual, el trabayu de Walterio xuega con dellos aspectos esenciales de les sociedaes d’agora, de la nuestra vida de diario y de les amenaces que tenemos que pasar y que paez que que son insepartables de la condición humana.
La estética, l’orde y la llimpieza siempre tuvieron nos trabayos d’él, pero na obra último esti artista amiésta-y el sentíu de los númberos, la idea d’echar les cuentes, de la medición y el cálculu, refiriéndose a les estadístiques rellacionaes cola violencia, pero tamién pensando no difícil que ye modificar los patrones de comportamientu antisocial. Como mediu pa espresase, usa coses de casa colocaes con muncho procuru, que ganen un significáu que nun teníen al poneles nun contestu nuevu.
Les pieces d’Iraheta van cambiando de tonu de manera gradual, toes d’un color namás, pueden interpretase como metáfores de la tolerancia: una reflexón sobre una cosa que fai bona falta pa ser quién a vivir en paz unos colos otros, sobre’l respetu de les idees diferentes, creencies o práctiques que tán más allá de lo que nosotros somos, facemos o pensamos. La obra de Walterio naz pa una sociedá que tuvo dividida en dos bandos demasiao tiempu y trata de separtase de los patrones vieyos pa garrar un camín nuevu.
Escala de Valores
¿Cómo te llames? ¿D’ónde yes? ¿Cuántos años tienes? ¿Cuánto peses? ¿Cuánto mides?… Midímoslo too, clasificámoslo too, eso ayúdanos a comprender y a organizar les coses que sabemos, por eso ye normal que les estadístiques se fueren convirtiendo, col tiempu, nuna parte tan importante de los discursos de les persones, medios de comunicación, empreses y polítiques. Nes estadístiques tamién se cuenten los actos violentos.
N’El Salvador tuvieron en guerra 12 años y hubo más de 75.000 víctimes. Hai venti años que se firmó la paz pero sesenta de cada cien mil habitantes morrieron ente los años 2004 y 2009. Esti país ta consideráu como’l más violentu del mundu. Tamién ye ún de los más arrasaos d’árboles y vexetación.
La casa propia ye un mundu, un espaciu, onde pasen les coses más importantes. Les coses que tán nella son trescendentales. Nesta serie, Walterio fai un exerciciu de redefinir, y saca oxetos d’usu diariu del entornu familiar con humor, proponiendo una serie de comentarios sobre la nuestra vida de tolos díes. Los cuchiellos llueven en techu, caballinos de xuguete, botes de deterxente y cerilles tan colocaos n’horizontal na paré sobre cifres que suponen variaciones de rangu. Estes coses yá nun valen pa cocinar, llimpiar nin xugar; agora tán nuna composición delicada y clara, como una estadística, de la que tol mundo somos parte.
Leave a Reply