La producción gallega O sabor das margaridas ye la séptima serie más vista nel Reinu Uníu de les que nun son ingleses. Esta serie pa televisión que dirixe Miguel Conde, acabó de rodase nel añu 2018 y estrenóse na televisión gallega. O sabor das margaridas cuenta la historia d’una guardia civil (qu’interpretada l’actriz Rosa Mera) con un pasáu complicadín que llega a un pueblu pequeñu, d’esos onde nunca pasa nada, pa investigar el casu d’una muyer que desapaeció. Dase la circunstancia de qu’esa falta nun-y interesa a naide. Y, con esi panorama, el casu empieza a ponese feu y peligrosu.
La primer temporada son seis episodios de 70 minutos, pero l’éxitu nes plataformes de comercialización de televisión dixitales, en concreto en Netflix, foi tal que yá tán preparando la segunda. Estes plataformes, como se demuestra con esta serie rodada en gallegu, tán permitiendo que producciones en llingües minoritaries –que les televisiones xeneralistes qu’emiten na llingua mayoritaria, el castellanu n’España, desprecien– puedan triunfar nun mundu global compitiendo con otres series de primer nivel.
La sociedá del conocimientu, la dixitalización y les fórmules nueves d’entretenimientu abrieron canales nueves tamién pa comunicase colos consumidores que, ensin tantu filtru como primero, puen escoyer ente una ufierta muncho mayor. Agora, l’escaparate ye mundial y la competencia tamién. Pero’l talentu y la calidá puen conocese y reconocese auquiera, ensin vetos. Y paez que’l públicu quier productos diferentes y, los de fuera, nun tienen prexuicios llingüísticos. Namás ven la calidá de la producción. Una gran noticia pa los que sentimos, falamos, creamos y escribimos en llingües minoritaries.
Leave a Reply