ALBERTO SUÁREZ
Fogueres de San Xuan, n’Asturies, habrá un cientu pero les urbanes –pueblos y villes tán tamién cada vez más urbanizaos n’usos y costumes– poco o nada tienen que ver coles que se prendíen nos tiempos pasaos. N’Uviéu, nel final del gabinismu, la foguera rodó per dellos escenarios hasta convertise nuna pila de palés malcuriosos, qu’al arder convertíense nun peligru pa los danzadores, grupos folclóricos que nun puen danzar y cantar a gusto porque les dimensiones de lo que yera una foguera tradicional tán sobrepasaes. Y ye qu’una foguera nun ye una falla de Valencia, nin una performance, nin un espectáculu. Valles de fierru, bomberos, escenarios, micros, espectáculos teatrales…
Una foguera, na tradición asturiana, ye namás qu’un fuéu alredor del que’l pueblu danza. Según tesimonios que recoyó Costantino Cabal, les fogueres yeren d’árgoma, rozu, escayos, artos y cardos qu’atropaben los mozos en monte. Estes plantes faen que’l fuéu estalle y salten chispes. En pueblos de Teberga tamién ta recoyida la costume d’echar piedres a la foguera qu’estallaben. La cosa yera facer ruíu, y facer a la xente, mozos y moces, tar vivos. Agora les mocines qu s’averen a les fogueres urbanes ye pa dar papelinos con coses escrites a los bomberos pa que los tiren al fueu. D’ú salió esa moda ye daqué pa investigar con tiempu pero nun tien nada que ver cola tradición de la foguera asturiana. Les moces, antiguamente, enramaben les fontes con flores, que priemero recoyíen peles sebes y praos.
L’agua ye otru de los elementos que garra un daqué máxicu alredor de la foguera y de la nueche de San Xuan. Les fontes, los ríos y hasta la rosada. Yera tradición en dalgunos pueblos, recoyida por Aurelio del Llano nel so llibru Del folklore asturiano: mitos, supersticiones, costumbres bañase en ríu y arrollicase polos praos desnudos, pa protexer o curar la piel. Toes estes tradiciones teníen que se facer enantes de que saliera la primer lluz de la mañana.
Tamién yera la nueche que podíen desencantase les xanes y atopar los tesoros y ayalgues. Bien mirao, los vezos recoyíos nun son más que maneres de pasalo bien, de saltar les normes ríxides de conducta cola disculpa de valir de melecina o protección. Fueu, calor, risa, agua y escuridá. Cantares, cortexos, sátires y palos. Maneres de divertise que yá nun lo son anguaño, ¿o sí? Too diba depender de cómo se fixera.
Los mozos facíen coses esa nueche pa que rabiare la xente al otru día. Quitaben les campanes de la ilesia, cambiaben les portielles de sitiu, los carros del país y otros preseos podíen acabar en cualaquier mazanal. Tamién ponién un ramu delantre de la puerta de casa de la moza pola qu’andaben. Na catedral d’Uviéu, ta la campana más antigua d’Europa entá n’usu, la Wamba, flundida en 1219. A ver quién ye’l guapu que la descolinga.
Y eso ye lo qu’acaba coles tradiciones nes ciudaes, porque la tradición asturiana ye difícil caltenela –nin se fai por ello– si se-y cambia’l sen, el tamañu, la escala. Y tamién porque s’importen otres pa dexar les nuestres. Les nuestres tradiciones son de pueblu, modestes, agraries… Y nes aldees asturianes nun hai mozos nin moces: onde más hai, queden los vieyos y vieyes coles fogueres y coples de la danza na memoria. Pero igual apaez entá una fonte enramada. Igual dalguién va coyer la flor del agua. Igual un día nel mundu urbanita hai un cientu de fogueres, una en cada plaza, piquiñines, atamañaes al pueblu que danza, canta y les disfruta.
Leave a Reply